बागलुङ, ६ चैत्र– नेकपा एमलोले पार्टी संगठनलाई सुदृढ र सशक्त बनाउन सुरु गरेको ‘मिसन ग्रासरुट’ अभियान वडा तहसम्म पुग्दा पार्टी कार्यकर्ताहरुमा उत्साह देखिएको छ ।
केन्द्र, प्रदेश, जिल्ला र पालिका कमिटिको अभिमुखीकरणपछि वडा तहमा केन्द्रित भएको अभियानले पार्टी सदस्यहरुमा नयाँ उत्साह थपेको गण्डकी प्रदेश कमिटि सचिवालय सदस्य लिला रानाले बताए । ‘पार्टी सबै तहका सरकारमा प्रतिपक्षमा रहने अबस्था आउँदा समेत कार्यकर्ताले अर्को दलको कार्यकर्ता आकर्षण गरिरहेका छन्’ रानाले भने ।
चैतको पहिलो सातादेखि वडा र टोलस्तर केन्द्रीत भएको ग्रासरुट अभियानले जनसंगठनलाई समेत क्रियाशिल बनाएको छ । आफ्नो सदस्यता आफै उपस्थित भएर नविकरण गर्नुपर्ने बाध्यकारी प्रावधानले कार्यकर्तामा थप उत्साह थपेको रानाको बुझाई छ ।
अभियानमार्फत एमालेलाई बागलुङमा पहिलो शक्तिका रुपमा स्थापित गरिने जिल्ला अध्यक्ष हिराबहादुर केसीले बताए । अभियानमा पार्टी, कार्यकर्ता र जनता बीचको सम्बन्धलाई कसिलो बनाउने तथा पार्टी सदस्यता नवीकरण, विस्तारको साथै जनताका समस्या, गुनासा र अपेक्षाहसमेत संकलन गरिने एमाले बागलुङले जनाएको छ ।
‘मिसन ग्रासरुट’ अभियानका लागि एमालेले बागलुङमा चार जना केन्द्रिय सदस्य खटाएको छभने प्रदेश र जिल्ला कमिटिका पदाधिकारी तथा सदस्यहरु गाउँ गाउँमा पुगेका छन् ।
‘निर्वाचनमा भन्दा गहिरो गरी पार्टीको अभियान जनताको घर दैलोमा पुगेको छ’ पार्टी अध्यक्ष केसीले भने ‘एमाले भोट माग्न चुनावमा मात्रै घरदैलोमा आउँदैन, जनताका सुखदुखमा पनि साथमा छभन्ने सन्देश प्रवाह भएको छ ।’
