पर्वत, ७ चैत्र– जग्गा वर्गीकरणमा ढिलाइ हुँदा दश महिनादेखि पर्वतमा जग्गाको कारोबार ठप्प बनेको छ । स्थानीय तहले जग्गा वर्गीकरणको काम गर्न नसक्दा जग्गाको कारोबार ठप्प बनेको हो ।
भूउपयोग नियमावली २०७९ अनुसार पालिका प्रमुखको अध्यक्षतामा भूउपयोग कार्यान्वयन समिति गठन गर्नुपर्ने व्यवस्था रहेको छ । सोही व्यवस्थाअनुसार गठित समितिले गरेको वर्गीकरणअनुसार जग्गाको कित्ताकाट, खरिद बिक्री, मूल्यांकन हुने व्यवस्था गरेको भएपनि पर्वतका सातवटै पालिकामा समिति सक्रिय हुन सकेका छैनन् ।
सबैभन्दा बढी घरजग्गा कारोबार हुने कुश्मा नगरपालिकामा समिति गठन भएपनि कार्यान्वयनमा जान सकेको छैन । नगरप्रमुख रामचन्द्र जोशीका अनुसार समिति गठन सकिएर जग्गा वर्गीकरणका लागि प्राविधिक टोलीले काम अघि बढाउने तयारी गरेको छ ।
फलेवास नगरपालिकाले पनि समिति गठन गरिसकेको प्रमुख प्रशासकीय अधिकृत नेत्रप्रसाद पौडेलले बताए । ‘विज्ञ सदस्यसहितको समिति गठन भएर वर्गीकरणको काम अघि बढाउन कार्यपालिकाको निर्णय कुरेर बसेका छौ’ पौडेलले भने ।
कृषियोग्य जमिनको खण्डीकरण रोक्ने, व्यवस्थित र सुरक्षित बसोबाससहित जग्गाको व्यवस्थित व्यवस्थापनको उद्देश्यले ऐन र नियमावली ल्याइएको मालपोत कार्यालय पर्वतका सूचना अधिकृत उमेश सापकोटाले बताए । ‘स्थानीय तहले ऐन कार्यान्वयन गरेर सिफारिस नगरेसम्म जग्गाको कारोबार यस्तै अवस्था रहन्छ’ सापकोटाले भने ।
