बागलुङ, ११ चैत्र– जिल्लामा हरेक बर्ष क्षयरोगका बिरामी बढ्दै गएका छन् । पछिल्लो तीन बर्षको तथ्यांक अनुसार बागलुङमा क्षयरोगको संक्रमण फैलिँदो अवस्था देखिएको हो ।
आर्थिक बर्ष २०७८÷७९ मा १ सय ८५ थियो । चालु आर्थिक बर्षको आठ महिनामा मात्रै १ सय २९ जनामा क्षयरोग संक्रमण पुष्टि भएको स्वास्थ्य कार्यालय बागलुङका क्षयकुष्ठ निरीक्षक देवप्रकाश घिमिरेले जानकारी दिए ।
अघिल्लो बर्ष पहिचान भएकामध्ये केही नियमित औषधि सेवनपछि निको भएका छन् । गतवर्ष जिल्लाभर क्षयरोगीको संख्या १ सय ८५ थियो । तीमध्ये ५६ जना बडिगाडका थिए । साउन यता बिभिन्न तहमा गरिएको परीक्षण तथा पहिचानका क्रममा ८७ जना नयाँ संक्रमित पहिचान हुँदा बडिगाडमा मात्रै ३६ जनामा संक्रमण पुष्टि भएको थियो ।
बडिगाडमा हरेक बर्ष जनचेतनामुलक कार्यक्रम, खोजपड्ताल र नियन्त्रणका कार्यक्रम सञ्चालन गर्दा समेत संक्रमण रोकथाम गर्न कठिन भएको घिमिरेले बताए । ‘पालिका अनुसारको तथ्यांक केलाउँदा अन्यत्रको संख्या घटेको भएपनि बडिगाडमा भने बढ्दो छ’, घिमिरेले भने, ‘बिरामीको मृत्युदरसमेत बडिगाडमा बढी छ ।’
गतवर्ष जिल्लाभर ६ जना क्षयरोगीको मृत्यु हुँदा बडिगाडका चार जना थिए । बागलुङमा क्षयरोगीको मृत्युदर कहालीलाग्दो अबस्थामा रहेको घिमिरेले बताउनुभयो । संक्रमण पुष्टि भएका बिरामीलाई स्वास्थ्यकर्मीको निगरानीमा नियमित औषधि खुवाउन थालिएको छ ।
