बागलुङ, २६ चैत्र– राष्ट्रिय जनमोर्चा बागलुङको सातौ जिल्ला सम्मेलनको सन्देश प्रवाह कार्यक्रम शनिबार बुर्तिबाङ बजारमा सम्पन्न भएको छ ।
कार्यक्रममा बोल्दै राष्ट्रिय जनमोर्चाका केन्द्रीय सदस्य गौरीश्वर पाण्डेले सातौं जिल्ला सम्मेलनले पार्टीलाई नयाँ जोशका साथ अघि बढ्ने म्याण्डेड दिएको बताउँदै जनस्तरमा पार्टीको नीति, कार्यक्रम र जनजिविकाको सवाल लिएर जानुपर्नेमा जोड दिए ।
पाण्डेले देशमा चरम आर्थिक संकटको कारण संघियता भएको भन्दै संघियता खारेज नगरे देशी विदेशी शक्तीले नेपालको अस्तित्व समाप्त पार्ने खतरा बढेको औल्याए ।
कार्यक्रममा अखिल नेपाल शिक्षक संघका जिल्ला उपाध्यक्ष दुर्गा बहादुर भण्डारी, ढोरपाटन नगरपालिका वडा नं. ७ का अध्यक्ष एवम् जनमोर्चाका जिल्ला सदस्य धनबहादुर अदै, बुद्विजीवि धनबहादुर कुँवर लगायतले मन्तव्य व्यक्त गरेका थिए ।
अराजकता र संघियता खारेजी लगायतका माग राखेर राष्ट्रिय जनमोर्चाले आन्दोलनका कार्यक्रम सार्वजनिक गरेको छ । नगर उपाध्यक्ष तमबहादुर घर्तीको अध्यक्षतामा सम्पन्न भएको कार्यक्रममा स्वागत सचिव तुल्सीराम खरेल र सन्चालन नगर कार्यालयका सचिव कुलबहादुर छन्त्यालले गरेका थिए ।
