बागलुङ, ४ पुस– जेष्ठ नागरिकको घर घरमा स्वास्थ्यकर्मी जाने अभियानलाई निरन्तरता दिंदै गलकोट नगर स्वास्थ्य शाखाले पाण्डवखानीमा तीन दिने बृहत स्वास्थ्य शिविर सम्पन्न गरेको छ ।
शिविरमा सयौंले स्वास्थ्य परीक्षण, उपचार र औषधी पाएका छन् । नगर स्वास्थ्य शाखा र पाण्डवखानी स्वास्थ्य चौकीको आयोजनामा भएको शिविरमा नगर अस्पतालका प्रमुख डा. राजेश पौडेल सहितका विभिन्न स्वास्थ्यकर्मी समेत पुगेर बिरामीको उपचार गरेका थिए ।
उपचारमा वडा नं. १० को पाण्डवखानी र रमुवाका स्थानीयले सेवा पाएका हुन् । स्वास्थ्य चौकीकी अहेव हिराकुमारी काउचाका अनुसार शिविरमा ५ सय ४० बिरामीले सेवा पाएका थिए ।
नगर अस्पतालले गाउँमै भिडियो एक्सरेको पनि व्यवस्थापन गरेपछि महिला स्वास्थ्य, हाडजोर्नी लगायतका बिरामीले पनि सेवा पाएका हुन् । यो वडाबाट नगर अस्पताल पुग्न कम्तिमा तीन घण्टा लाग्छ । त्यसैले उनीहरुको घरदैलोमा सेवा पु¥याउन शिविर राखिएको नगर स्वास्थ्य शाखाका प्रमुख सुशिल पौडेलले बताए ।
‘हामीले सबै वडामा स्वास्थ्य सेवा चुस्त बनाउन खोजेका छौं’ पौडेलले भने, ‘त्यसका लागि मौका पारेर शिविर संचालन भएको हो ।’ शाखाले सबै वडामा डिजिटल प्रविधि पनि जडान गरेको छ । उक्त प्रविधि अनुसार हरेक दिन हरेक स्वास्थ्य संस्थामा कुन रोगका कति बिरामी आएर सेवा पाए भन्ने तथ्यांक राखिने गरिएको छ ।
यो विधिले तत्काल औषधिको व्यवस्थापन, बिरामीको पहिचान र उपचारमा साथ दिन सहज भएको उनले बताए ।
