बागलुङ, १५ मंसिर- प्रसिद्द गाजा दहलाई पर्यटकीय गन्तव्यको रुपमा प्रचार गर्दै स्थापित गर्न शनिबारदेखि सञ्चालनमा रहेको श्रीमद्भागवत ज्ञान महायज्ञको शुक्रबार समापन गरिएको छ । सिद्धबराह मन्दिर संरक्षण समितिको आयोजनामा महायज्ञ आयोजना गरेको थियो ।
महायज्ञबाट ६४ लाख रुपैयाँ दान संकलन भएको महायज्ञ मुल आयोजक समितिका प्रचार प्रसार संयोजक दिलिप प्रतेलले जानकारी दिए । महायज्ञको व्यवस्थापन लगायतका काममा २० लाखभन्दा धेरै खर्च भएको अनुमान छ ।
महायज्ञमा शिवदत्त रेग्मीले प्रमुख वाचकको भूमिकामा रहेका थिए । जैमिनी संकृतन समूहले भजनको व्यवस्थापन मिलाएको थियो । महायज्ञ सफल बनाउन जैमिनी नगरपालिकाले काठेखोलातर्फको चापाखर्कदेखि गाजा दह र कुश्मीसेरादेखि दमेकहुँदै गाजा दह सम्मका सर्वसाधारण्लाई पालैपालो महायज्ञस्थलमा उपस्थित गराईएको थियो । गाजा दह समुन्द्री सतहदेखि २ हजार ४ सय ६० मिटर उचाइमा छ । चिसो मौसम र भौगोलिक कठिनाईका कारण महायज्ञमा अनुमान गरेजस्तो भक्तजनको उपस्थिती नभएको मुल आयोजक समितिले जनाएको छ ।
