बागलुङ, १४ पुस- जिल्ला खेलकुद विकास समिति बागलुङले अध्यक्ष कुमार खड्कालाई सम्मान गरेको छ । केही महिना पहिले भारतको सुकरात सामाजिक अनुसन्धान विश्वविद्यालयबाट मानार्थ विद्याबारिधि पाएका खड्कालाई समितिले सम्मान गरिएको हो ।
शनिबार एक समारोहको आयोजना गरी समितिका पदाधिकारी तथा सदस्यहरुले खादा, माला र सम्मानपत्रले खड्कालाई सम्मान गरेका हुन् । उनले पाएको मानार्थ विद्याबारिधिले जिल्लाको खेलकुद क्षेत्रमा सम्मानको वातावरण बनेको भन्दै समितिले सम्मान गरेको हो ।
सम्मानपछि बोल्दै खड्काले आँफुले सुकरात सामाजिक अनुसन्धान विश्वविद्यालयबाट पाएको विद्याबारिधिको बिषयमा अनेक टिकाटिप्पणी भएपनि समाजिक क्षेत्रमा गरेका कामको मुल्यांकन भएकाले बिचलित नभएको बताए । कुखुरापालक संघको अध्यक्ष बनेर बोल्दादेखी निर्माण व्यवसाय र राजनीतिसम्मका कामको मुल्यांकन भएको उनले बताए ।
खड्कालाई सम्मान गर्न जिल्लामा क्रियाशिल खेलकुद संघका अध्यक्ष तथा पदाधिकारी, बिभिन्न खेलका प्रशिक्षकहरु सहभागि थिए । खेलकुद विकास समितिका उपाध्यक्ष समिक्षा थापाको अध्यक्षता, तेक्वान्दो प्रशिक्षक परशुनारायण बोहोराको स्वागत र खेलकुद विकास समितिका पूर्व लेखापाल यामबहादुर थापाको सञ्चालनमा कार्यक्रम सम्पन्न भएको थियो ।
