काठमाडौं / नेकपा (एमाले) नेता महेश बस्नेतलाई प्रहरीले पक्राउको तयारी गरेको छ । आइतबार नै पक्राउको तयारी गरेको भएपनि अनुकुल वातावरण नभएकाले रोकिएको अहिले यसको तयारी भएको प्रहरी स्रोतले जनाएको छ । प्रहरी स्रोतका अनुसार आइतबार साँझ नै बस्नेतलाई पक्राउको तयारी भएको थियो । बस्नेत विरूद्धको साइबर अपराधमा उजुरी परेको र त्यसको आधारमा पक्राउको तयारी भएको हो ।
जानुका पाठक (शोभा)ले बस्नेत विरुद्ध सामाजिक सञ्जाल मार्फत चरित्र हत्या गरेको भन्दै प्रहरीको केन्द्रीय अनुसन्धान ब्यूरोमा जाहेरी दिएकी थिइन् । सोही जाहेरीलाई प्रहरीले व्यूताएर पक्राउको तयारी थालेको हो । यसअघि प्रहरीले जाहेरीमाथि थप अनुसन्धान गर्न निरर्थक हुने भन्दै तामेलीमा राख्न जिल्ला सरकारी वकिल कार्यालयमा पत्र पठाएको थियो ।
जिल्ला सरकारी वकिल कार्यालयले बस्नेतले फेसबुकमा ‘नेपालको राजनीतिमा एउटा भालु पछिल्लो अवस्थामा जहाँ पनि छरपस्ट बौलाउँदै हिँडिरहेको छ’ भनेर अमूर्त ढङ्गले अमर्यादित रूपमा भालु शब्द लेखेकोमा कसलाई, कुन प्रयोजनका लागि लेखिएको हो सो खुलाउन भनिएको छ । प्रहरीले यसको तयारी गरेको संकेत स्वंय बस्नेतले पनि जानकारी पाइसकेका छन् । केही दिनदेखि गृहमन्त्रलायले बस्नेतको गतिविधिप्रति निगरानी राखेको थियो ।
