काठमाडौं, १४ मंसिर– नेपालमा ५ वर्षभन्दा कम उमेरका बालबालिकामा हुने पुड्कोपनमा उल्लेखनीय सुधार आएको छ । नेपाल जनसांख्यिक तथा स्वास्थ्य सर्वेक्षण (एनडीएचएस) २०२२ ले नेपालमा ५ वर्षभन्दा कम उमेरका बालबालिकामा हुने पुड्कोपनमा सुधार आएको देखाएको हो ।
नेपालमा हरेक पाँच वर्षमा एनडीएचएस सर्वेक्षण हुँदै आएको छ । स्वास्थ्य तथा जनसंख्या मन्त्रालयले विभिन्न दातृ निकायसँगको सहकार्यमा गरेको उक्त सर्वेक्षणको रिपोर्टले नेपालमा पाँच वर्षमुनिका बालबालिकाको पुड्कोपनको अवस्थामा पाँच वर्षको अवधिमा ११ प्रतिशतले कमी आएको पुष्टि गरेको हो ।
पाँच वर्षअघिको यही सर्वेक्षणले नेपालमा पाँच वर्षमुनिका ३६ प्रतिशत बालबालिकामा पुड्कोपन रहेको देखाएको थियो । यही सर्वेक्षणले पाँच वर्षमा ११ प्रतिशतले पुड्कोपना हटेर २५ प्रतिशतमा झरेको देखाएको हो ।
विगतमा नेपालमा पाँच वर्षमुनिका बालबालिकामा हुने पुड्कोपनमा सन् २०१६ मा ३६ प्रतिशत रहेको थियो । सर्वेक्षणले पाँच वर्षमुनिका बालबालिकामा हुने पुड्कोपना कम हुँदै गएपनि हाल देखिएको २५ प्रतिशत पुड्कोपनमा सबैभन्दा धेरै कर्णालीमा रहेको छ ।
