म्याग्दी, १८ पुस– अफ्रिकन स्वाइन फिभरको संक्रमणका कारण म्याग्दीमा बंगुर मर्न थालेका छन् । बेनीबजार तथा ग्रामीण क्षेत्रमा पालिएका बंगुरमा संक्रमण देखिएपछि तीन सयभन्दा बढी बंगुर मरेको भेटेरेनरी अस्पताल तथा पशुविज्ञ केन्द्र म्याग्दीले जनाएको छ ।
व्यावसायिक रूपमै फार्ममा पालिएका बंगुर मर्न थालेपछि विज्ञ केन्द्रको टोलीले गरेको अनुगमन तथा केही फार्मबाट लिइएको नमूनामा अफ्रिकन स्वाइन फिभर पुष्टि भएको विज्ञ केन्द्रका प्रमुख जीवनप्रसाद आचार्यले जानकारी दिए ।
पहिलोपटक पोखराबाट ल्याइएको उत्तरी म्याग्दीको अन्नपूर्ण गाउँपालिका वडा नं. २ मा रहेको फार्मको बंगुरमा पशुपंक्षी अन्वेषण परीक्षण गर्दा अफ्रिकन स्वाइन फिभरको पुष्टि भएको थियो । सो क्षेत्रका ४० भन्दा बढी बंगुर मरेपछि केन्द्र र गाउँपालिकाको पशु सेवा शाखासहितको टोलीले अनुगमन गरेको थियो ।
केन्द्र प्रमुख आचार्यले अफ्रिकन स्वाइन फिभरले मान्छेमा कुनै असर भने नगर्ने बताए । बंगुरमा मात्र देखिने यो रोगको कुनै उपचार नरहेको पशु चिकित्सक बताउँछन् । स्वाइन फिभरको पूर्ण उपचार नभए पनि छ–छ महिनामा बंगुरलाई खोप लगाएर न्यूनीकरण गर्न सकिने केन्द्रका प्रमुख आचार्यको भनाई छ ।
बेनी नगरपालिकाको मंगलाघाटमा साढे दुई सय बंगुर मरेको अवस्थामा भेटिएकाले रोकथाम र नियन्त्रणमा केन्द्रित भएको पशु प्राविधिक प्रदीप गौतमले बताए ।
पशु सेवा शाखाका अनुसार रनबहादुर बुढाथोकीका ४२, श्यामकुमार गोतामेका ४०, बिना गोतामेका पाँच, टकबहादुर बुढाथोकीका ६५, टीका रोकाका २६ र पूर्वराज घर्तीको सात वटा बंगुर मरेको विवरण संकलन गरिएको छ ।
पछिल्लो समय बंगुरमा अफ्रिकन स्वाइन फिभर संक्रमण देखिएकाले रोगको शंका लागेका पशुलाई बथानबाट अलग्गै राखी जानकारी दिन र मरेका जनावरलाई खाडलमा पुर्न भेटेरेनरी अस्पताल तथा पशुविज्ञ केन्द्रले अनुरोध गरेको छ ।
