बागलुङ, ७ फागुन– महाशिवरात्रीको अबसरमा बागलुङका विभिन्न शिव मन्दिरमा पूजा गर्ने, भजनकृतन तथा अन्य विभिन्न गतिविधि गरेर शिवरात्री मनाउँदा हात्तिपाइले रोगविरुद्वको अभियानलाई समावेश गरिएको छ ।
बागलुङ नगरपालिका वडा नं. ४ उपल्लाचौरस्थित गौरीधाम शिवमन्दिरमा हात्तिपाइले रोगबिरुद्ध भजन प्रतियोगितासहित शिवरात्री मनाइएको छ । नगर स्वास्थ्य शाखाको सहयोगमा आयोजित भजन प्रतियोगितामा हात्तिपाइले रोग निको पार्न अनिवार्य रुपमा औषधि सेवन गर्नुपर्ने सन्देश दिइएको थियो ।
त्यस्तै, ब्रम्हकुमारी इश्वरीय विश्व विद्यालयमा आयोजित ८७ औं शिवरात्री समारोहमा पनि हात्तिपाइले रोगबिरुद्धको औषधि खानुपर्ने सन्देश दिइयो । बागलुङ नगर स्वास्थ्य शाखाका प्रमुख रामप्रसाद खनालले हात्तिपाइले बिरुद्धको अभियानबारे जानकारी गराएका थिए ।
धार्मिक क्षेत्रका मानिसले औषधि नखाएको धेरै पाइएको खनालको भनाई थियो । सहरी क्षेत्रका, ठूला र अग्ला घरमा बस्नेहरुले औषधि नखाएकोले बागलुङ नगरसहित जिल्लामै हात्तिपाइलेका बिरामी बढीरहेको तथ्यांक छ । खनालका अनुसार, बागलुङ नगरपालिकाभित्र मात्रै झण्डै ८० जना हात्तिपाइलेका संक्रमित रहेका छन् ।
सबै धार्मिक स्थलमा सचेतना फैलाइएको हात्तिपाइले बिरुद्धको औषधि सेवन फागुन १० गतेदेशि शुरु हुनेछ । यो अभियानमा अनिवार्य औषधि खान सबै पक्षले आग्रह गरेका छन् । फागुन ११ गते टोलटोलमा खुवाइने कार्यक्रम पनि छ ।
‘यो पटक सुरक्षाकर्मी जस्तै सबै शिवमन्दिरमा पुगेर भक्तजनलाई हात्तिपाइले रोग बिरुद्दको औषधि सेवन गरिदिन आग्रह गरिएको छ’ जनस्वास्थ्य निरीक्षक लक्ष्मी शर्माले भनिन् । अन्य धार्मिक आस्था राख्नेले पनि औषधि सेवनमा आनाकानी गरेपछि धार्मिक गुरुमार्फत औषधि खानका लागि आग्रह गर्न लागिएको शर्माले जानकारी दिइन् ।
