बागलुङ, १४ चैत्र– सिकार खेल्न विदेशी पर्यटकहरु ढोरपाटन शिकार आरक्षको सिकार ब्लकमा पुगेका छन् । यस वर्षको दोस्रो याममा १२ नाउर र नौ झारलको सिकार हुनेछन् ।
७ कम्पनीले पेशेवर विदेशी सिकारीलाई आरक्षमा सिकार गराउने छन् । यसवर्ष दोस्रो यामको लागि ७ कम्पनीबाट ८ देशका नागरिकले सिकार गर्न लागेको ढोरपाटन सिकार आरक्षका प्रमुख संरक्षण अधिकृत वीरेन्द्र कँडेलले जानकारी दिए ।
अमेरिकी दुई सिकारीले फागुनेमा १ नाउर, १ झारल र बार्सेमा १ नाउर, क्यानेडियन सिकारीले घुस्तुङमा १ नाउर र १ झारल, हंगेरियन सिकारीले गुस्तुङमा १ नाउर र १ झारल, फ्रान्सेली सिकारीले सुनदहमा १ नाउर र १ झारलको सिकार गर्ने छन् ।
यस्तै, पोर्चुगलका सिकारीले सुनदह एक नाउर, पोल्याडका सिकारीले दोगाडीमा एक नाउर, रसियन सिकारीले दोगाडीमा एक नाउर र घुस्तुङमा एक झारल, स्पेनिस सिकारीले वार्सेमा एक नाउर र गुस्तुङमा एक झारल, अमेरिकन सिकारीले दोगाडी, सेङ र गुस्तुङ ब्लकमा ३ नाउर ३ झारलको सिकार गर्ने छन् ।
सिकार गर्न दुई जना सिकारीहरू ढोरपाटन आइपुगेका छन्भने अन्य सिकारी आउने क्रम जारी रहेको अधिकृत कँडेलले बताए । यस पटक सिकारीले एक नाउरको पाँच लाख २० हजारदेखि ७ लाख ८० हजारसम्म र झारलको ३ लाखदेखि तीन लाख १० हजार रुपैयाँ राजश्व बुझाएका छन् ।
