निलगिरि जलविद्युत आयोजनाको ८० प्रतिशत निर्माण

प्रतिकात्मक तस्बिर
म्याग्दी, १० जेठ– अन्नपूर्ण गाउँपालिका–४ नारच्याङमा निर्माणाधीन निलगिरि जलविद्युत आयोजनाको करिब ८० प्रतिशत निर्माण सम्पन्न भएको छ ।
निलगिरि खोला हाइड्रोपावरले चार वर्षअघि एकैसाथ ३८ मेगावाटको निलगिरि पहिलो र ७१ मेगावाटको दोस्रो गरी १ सय ९ मेगावाट क्षमताको जलविद्युत आयोजना निर्माण थालेको थियो ।
आयोजनाका अनुसार दुवै आयोजनाको बाँधस्थल, सुरुङ खन्ने र विद्युतगृह निर्माण काम सकिएको छ । निलगिरि पहिलोको दुई हजार मिटर र दोस्रोको चार हजार दुई सय मिटर सुरुङ खन्ने काम सकिएर ढलानको काम थालिएको आयोजनाका आवशिय इन्जिनियर रत्नबमजन तामाङले जानकारी दिए ।
पेनस्टक टनेल खन्ने काम सकिएर पहिलो आठ सय मिटर र दोस्रोको १५ सय मिटर पेनस्टक पाइप जडानको काम थालिएको तामाङले बताए । दुवै आयोजनाका लागि निर्माण गरिने विद्युतगृहको सिभिल स्टक्चरको काम सकिएर इलोक्ट्रोमेकानिकलको काम थालिएको छ ।
आगामी ६ महिनामा दुवै आयोजना एकसाथ सम्पन्न गर्ने लक्ष्यका साथ काम भइरहेको तामाङले बताए ।