बागलुङ, ८ भदौ– गलकोट समाज जापानले गलकोट नगर अस्पतालमा आबस्यक पर्ने लाखौंको उपकरण सहयोग गरेको छ ।
समाजले बिहिबार मात्रै ३५ लाख रुपैयाँको लागतमा अल्ट्रा साउण्ड मेसिन सहयोग गरेको हो । गलकोट समाज जापानका उपाध्यक्ष अमर भण्डारीले नगर प्रमुख भरत शर्मा गैरे, अस्पतालका प्रमुख डा. राजेश पौडेललाई उक्त मेसिन हस्तान्तरण गरे ।
समाजले यसअघि पनि नगर अस्पताल संचालनका लागि दर्जनौं सामाग्री, उपकरण तथा भवन निर्माणमा समेत सहयोग गरेको थियो । अस्पताल संचालन गर्नका लागि समाजमार्फत एम्बुलेन्ससमेत सहयोग आएको नगर प्रमुख भरत शर्मा गैरेले बताए । अस्पतालभित्रै डेन्टल मेसिन, भिडियो एक्सरे, आँखा उपचार केन्द्र, बिरामी सुत्ने आधुनिक शैया, फोल्डिङ गर्ने बिरामी कुरुवा कुर्सी लगायतमा पनि समाजबाट सहयोग आएको हो ।
एक बर्षदेखि गलकोटमा नगर अस्पताल १५ शैयाको संचालनमा छ । यहाँ एमडिजिपी डा. राजेश पौडेलसहित दुइ जना चिकित्सक र अन्य स्वास्थ्यकर्मीको दरबन्दी व्यवस्थापन गरेपछि अस्पतालमा दैनिक १ सय ७० जनासम्म बिरामीले उपचार सेवा पाएको तथ्यांक छ । ‘यतिधेरै जनताले नियमित सेवा पाउने भएपछि हामीले जापानमा बसेर पनि सहयोग जु्टायौं’ गलकोट समाज जापानकी अध्यक्ष कालिका थापाले भनिन्, ‘गाउँको विकासमा विदेशमा बसेर धेरैको चिन्ता र चासो छ ।’
गाउँमा उपचार नपाएर थलिएका तथा दुर्घटनामा परेका बिरामीलाई उपचारमा पनि लाखौं सहयोग गरेका छन् । दशकदेखि सक्रिय गलकोट समाज जापानले नगरभित्रका क्रियाकलापमा १८ करोड बढी रकम सहयोग गरेको प्रारम्भिक तथ्यांक छ । तीन बर्षअघि ढोरपाटनमा गएको पहिरोबाट ठूलो क्षति हुँदा एक करोड बढी रकम र केही सामाग्री उनीहरुले सहयोग गरेका थिए ।
