बागलुङ, २९ पुस– बागलुङ नगर खानेपानी तथा सरसफाई उपभोक्ता संस्थाको अध्यक्षमा केबी राना मगर बिजयी भएका छन् । शनिबार बागलुङ बजारमा सम्पन्न संस्थाको अधिबेशनले रानाको नेतृत्वमा नयाँ कार्यसमिति चयन गरेको हो ।
रानाले अर्का प्रत्याशी जयराम भारीलाई २६ मतान्तरले पराजित गरे । उनले ४३४ मत ल्याउँदा उनका निकटतम प्रतिद्धन्दी जयराम भारीले ४०८ मत ल्याए । अध्यक्ष पदका अर्का प्रत्याशी भुपेन्द्र खड्काले ८५ मत पाए ।
त्यस्तै उपाध्यक्षमा हरीबहादुर जिसी (सन्तोष) निर्वाचित भएका छन् । उनले ४४७ मत पाउँदा उनका प्रतिद्धन्दी रतन प्रसाद मलेपतिले ४४३ मत पाए । जिसी जयराम भारी प्यानलबाट चुनाव लडेका थिए । सचिवमा जीवन आचार्य निर्वाचित भएका छन् । उनले ४७४ मत पाउँदा उनका प्रतिद्धन्दी निर्मल बहादुर श्रेष्ठले ४३७ मत पाए । कोषध्यक्षमा कृष्ण शर्मा निर्वाचित भएका छन् । उनले ५०० मत पाउँदा उनका प्रतिद्धन्दी थानेश्वर सुवेदीले ३८५ मत पाएको निर्वाचन समितिले जनाएको छ ।
खुल्ला सदस्यमा केबी राना प्यानलका कुलराज शर्मा हिमाल र जयराम भारी प्यानलका शिव आचार्यनिर्वाचित भएका छन् । महिला सदस्यमा राना प्यानलकी कालिका सापकोटा, र हुमादेवी खड्का तथा भारी प्यानलकी गुमादेवी श्रीष छन्त्याल निर्वाचित भएका छन् ।निर्वाचनमा कुल ९८५ मत खसेको थियो ।
