बागलुङ, २६ माघ– सदरमुकाम बागलुङ बजारका चार विद्यालयका शिक्षक शुक्रबार बिहानै योगाशनमा देखिए । धौलागिरी आयुर्वेद औषधालयको ठुलो हलमा चार विद्यालयका प्रधानाध्यापक र केही शिक्षकलाई औषधालय प्रमुख सरद पन्थीले योग सिकाईरहेका थिए ।
भुईंमा म्याट बिच्याएर बसेका शिक्षकहरु पन्थीकै निर्देशनमा योगाभ्यास गरिरहेका थिए । एकैछिनमा प्रमुख जिल्ला अधिकारी खगेन्द्र रिजाल आए । केहीबेर औपचारिक सत्र चल्यो र फेरी सुरु भयो योग कर्मकै शिलशिला । कार्यक्रम थियो विद्यालय आयुर्वेद तथा योग शिक्षा सम्बन्धि शिक्षकहरुका लागि तालिम । तालिमको उद्घाटन पूर्वनै सहभागि शिक्षकहरुलाई योगाभ्यास गराईएको थियो । योग अभ्यासमा सहभागी भएका शिक्षकहरुले योग मात्रै सिकिरहेका छैनन् । तालिममा आयुर्वेद र जडिबुटी सम्बन्धि जानकारीहरु पनि आदानप्रदान भैरहेका छन् ।
‘शिक्षकहरुलाई तालिम पूर्वको तालिम दिएर विद्यार्थीमार्फत अभिभावकसम्म योग र आयुर्वेद सम्बन्धि चेतनाको पुर्याउने हाम्रो योजना हो’ पन्थीले भने ‘पहिलो चरणमा चार वटा मात्रै विद्यालयका प्रधानाध्यापक, शिक्षकहरुलाई तालिम दिँदै छौं ।’ योग, खानपान, परम्परा, संस्कार र संस्कृतिको बारेमा यस्तै कार्यक्रम यो बर्ष मात्रै नभएर हरेक बर्ष गर्ने औषधालयले जनाएको छ ।
‘अहिलेको पुस्तालाई विद्यालयबाटै सम्झाउँदै लैजान सकियो भने उनीहरूमा छिटो परिवर्तन आउँछ’ प्रमुख जिल्ला अधिकारी रिजालले भने ‘योगसंगै खानपान, जीवनशैली, रहनसहन, संस्कार, संस्कृति, परम्पराबारे सिकाउन जरुरी छ ।’ विद्यालय र शिक्षकबाट यो सबै सम्भव रहेको उनले बताए ।
पछिल्लो समय योगमा आकर्षण बढेको भए पनि भोजनप्रतिको व्यवहार बिग्रेकाले हरेक व्यक्तिले योगको अभ्यास गर्नुपर्ने औषधालयका चिकित्सक कमलबिक्रम पौडेल बताउँछन् । तालिममा विद्यामन्दिर, रुद्रेपीपल, फ्युचर ब्राईटर मावि र न्यु ओएसीस एकेडेमीका प्रधानाध्यापक, विद्यालय नर्स र केही शिक्षक सहभागि रहेका छन् ।
