बागलुङ/मध्यपहाडी लोकमार्ग अन्र्तगत बागलुङको निसीखोला गाउँपालिका वडा नंं ६ को जाउलेपानीमा बस पल्टिंदा २१ जना यात्री घाइते भएका छन् ।
बुधबार दिउसो साँढे चार बजेको समयमा रुकुमपूर्वबाट काठमाण्डौ जाँदै गरेको ना ८ ख ८४१४ नम्बरको रात्री बस सडक देखि पल्टेको हो । घाइतेलाई उपचारकालागि प्राथमिक स्वास्थ्य केन्द्र बुर्तिवाङ पठाइएको प्रहरीले जानकारी दिएको छ ।
घटनाको जानकारी हुनासाथ इलाका प्रहरी कार्यालय बुर्तिवाङबाट प्रहरी निरीक्षक आनन्द बस्नेतको नेतृत्वमा १० जना र प्रहरी चौकी निसीखोलाबाट समेत टोली उद्दारमा खटाइएको जिल्ला प्रहरी कार्यालयले जानकारी दिएको छ ।
घाइतेको पहिचान खुल्न बाँकी रहेको प्रहरी निरीक्षक सुनिल चिलुवालले बताउनुभयो । घटनास्थल इलाका प्रहरी कार्यालयबाट ३० किलोमीटर र सदरमुकामबाट १ सय २० किमी पश्चिममा पर्छ । घटनामा थप उद्दारको काम भैरहेको चिलुवालले बताए । सोही स्थानमा गतवर्ष चैतमा भएको बस दुर्घटनामा ९ जनाको मृत्यु भएको थियो ।
