बागलुङ, १२ पुस-जिल्लाका स्थानीय तहमा वडा सदस्य मञ्च गठन प्रकृयाले गति लिन थालेको छ । गत वर्ष बागलुङ नगरपालिकाका वडा सदस्यहरुको भेलाले मञ्च गठन गरेको थियो ।
मञ्चले जिल्लाका सबै पालिकामा मञ्च गठनका लागि पहल थालेको हो । वडा सदस्यहरुले आफ्नो हकहित र अधिकारका लागि मञ्च गठन गर्न थालेका हुन् ।
वडा सदस्य मञ्च बागलुङ नगरपालिकाले बिहिबार जिल्लाको काठेखोलाका कार्यबहाक अध्यक्ष तेजबहादुर थापासहित कार्यपालिका सदस्य र वडा सदस्यलाई भेटेर मञ्च गठनको पहल गरेको छ । ‘हामी जिल्लाका दशवटै स्थानीय तह पुग्दै छौं, काठेखोलामा पहिलो भिजिट हो’ वडा सदस्य मञ्च बागलुङका संयोजक अर्जुन घिमिरेले भने ‘यो एउटा प्रकृया हो, पालिका प्रमुख र उपप्रमुख तथा वडा अध्यक्षहरुकै सहयोगमा मञ्च गठन हुनेछन् ।’
संविधानले तोकेका काम, कर्तव्य र अधिकार प्रयोगका लागि मञ्च गठन गर्नुपरेको उनले बताए । भुमिकाहिन वडासदस्यलाई कृयाशिल बनाउन, वडा र पालिकाका काममा थप सहयोगी बन्न वडा सदस्यलाई प्रेरित गर्नेगरी मञ्च गठन गर्न थालिएको घिमिरेले बताए ।
पालिकाभित्रको चौतर्फी विकासमा टेवा पुर्याउन मञ्च गठन गरिएको उनको धारणा थियो । बागलुङ नगरपालिकाको वडा सदस्य मञ्चका पदाधिकारीसँग गाउँपालिकाका कावा अध्यक्ष तेजबहादुर थापाले रचनात्मक कामका लागि गठन हुने युनियनहरुलाई गाउँपालिकाले स्वागत गर्ने बताए ।
