बागलुङ, १६ बैशाख- अबैध रुपमा जुवा खेलाएको देखेपछि नगर प्रहरीले केही मानिस पक्राउ गर्छ । सामान बरामद गर्छ र जिल्ला प्रहरीलाई बुझाउँछ । तर, प्रहरीले उनीहरुलाई छाडी दिन्छ ।
यो घटना बागलुङ बजारमा भएको हो । अवैध ढंगले जुवा (गोटी) खेलाएर पैसा असुल्नेलाई जिल्ला प्रहरी कार्यालय बागलुङले मुद्दा नचलाई छाडेको हो । प्रहरीको आँखा अगाडि नै लामो समयदेखि बागलुङ नगरपालिका १ बाङगेचौरको लामो पुल परिसरमा अवैध ढंगले गोटी खेलाई सोझासाझा स्थानीयबाट रकम ठगी भैरहेको थियो ।
पटक पटक देखेपछि बागलुङ नगरपालिकाको नगर प्रहरीले ती व्यक्तिलाई नियन्त्रण लिएर प्रहरीलाई जिम्मा लगाएको थियो । सोमबार प्रहरीले रीत नपुगी समातेको भन्दै उनीहरुलाई छाडेको हो । यसअघि पनि नगर प्रहरीले विभिन्न समयमा गोटी नियन्त्रणमा लिन प्रहरीलाई खबर गरेपनि प्रहरीले चासो नदिएको हो । सोमबार पुल परिसरबाट गोटी खेलाईरहेका पोखरा उप महानगरपालिका १७ विरौटाका कृष्ण घिमिरे र जैमिनी नगरपालिका ६ का कृष्ण थापालाई नियन्त्रणमा लिएर प्रहरीलाई बुझाए पनि प्रहरीले फिर्ता पठाएको हो ।
दुई जनाको साथबाट ३ थान गोटी र नगद १० हजार ३ सय ३० नगर प्रहरीले बरामद गरेको छ । नगर प्रहरीले नियन्त्रणमा लिएका व्यक्ति रितपूर्वक नपठाएको भनि फिर्ता पठाएको प्रहरी उपरीक्षक ऋषिराम कँडेलले बताए । नगर प्रहरीले क्षेत्राधिकारभन्दा बाहिर गएर नियन्त्रणमा लिएको, मुचुल्का नउठाई नियन्त्रण लिएकोले कानुन सम्वत नभएको र पक्राउ गरेपछि मुद्दा चलाउन कानुनी जटीलता हुने भएकोले फिर्ता पठाएको कँडेलको भनाइ छ । नगर प्रहरीले नियन्त्रणमा दिएका २ जनालाई प्रहरीले बुझ्न नमानेपछि नगरपालिकाले त्यसै छाड्न बाध्य भएको छ ।
अवैध ढंगले लामो समयदेखि बागलुङ बजारको विभिन्न स्थानमा जुवा खेलाएर सोझा स्थानीयसँग पैसा असुल्ने कार्य गरिरहेपनि प्रहरी प्रशासन यस विषयमा मौन भएर बस्ने गरेको छ । गत चैतेदशै मेलामा पनि प्रहरीकै अगाडि निरन्तर जुवा खेलाउनेहरु थिए ।
