बागलुङ, ६ साउन– उपचारको लागि पर्वत अस्पतालमा आएका दुई जनामा डेंगुको संक्रमण रहेको पुष्टि भएको छ । पर्वतका अस्पतालका सूचना अधिकारी जनस्वास्थ्य निरीक्षक लक्ष्मण उपाध्यायका अनुसार स्वास्थ्यमा समस्या आएपछि परीक्षणका लागि आएकामध्ये दुई जनामा डेंगुको संक्रमण रहेको पुष्टि भएको हो ।
उनीहरू दुवै जना कुश्मा नगरपालिकाका बिरामीहरू भएको अस्पतालले जनाएको छ । घरमा रहेको बसिरहेको अवस्थामा लगातार ५÷७ दिनसम्म ज्वरो आएपछि उपचारको लागि आएका उनीहरूमा संक्रमणको शंकामा प्रयोगशालामा गरिएको परीक्षणबाट डेंगु रहेको पुष्टि भएको उपाध्यायले जानकारी दिए ।
स्वास्थ्य कार्यालय पर्वतका निमित्त कार्यालय प्रमुख सन्तोष पौडेलले अस्पतालको ल्याबमा गरिएको परीक्षणबाट दुई जनामा सङ्क्रमण पुष्टि भएको बताउँदै गत वर्ष कसैमा पनि पुष्टि नभएको तर त्यसअघि भने संक्रमण देखिएको बताए । संक्रमण देखिनुको अर्थ सबै जना सचेत हुनुपर्ने सूचना मिलेको बताउँदै उनले लामखुट्टेको टोकाइबाट बच्नका लागि सुझाव दिए ।
