बागलुङ, ६ भदौ– बागलुङ कालिका गुठी व्यवस्थापन समितिले मन्दिरमा चढेको आर्थिक हिसाबकिताबसहित जिन्सी पनि सार्वजनिक गरेको छ ।
आइतबार पत्रकार सम्मेलन गरेर २०७७ कात्तिक २८ देखि हालसम्म मन्दिरमा चढाइएको गरगहनाको सार्वजनिक जानकारी गराएको हो । गुठीका अध्यक्ष कुमार खड्काले मन्दिरप्रति जनताको विश्वास बढाउने र पारदर्शी बन्ने लक्षले जिन्सी सार्वजनिक गरेको बताए ।
सार्वजनिक बिवरण अनुसार गुठीले २७ प्रकारका गहना आइतबार सार्वजनिक गरेको हो । जसमध्ये ११ थान सुनको तिलहरी, २ थान सुनको सिक्री, ४ वटा टिका, ५ वटा मुन्द्र, सुनको चन्द्रमा, सुनको फुली, प्रतिमा, सिक्का, औठी, सुनकै जन्तर, नाग, तार लगायत छन् । त्यस्तै चाँदीतर्पm पनि तिलहरी, घोडाा, औठी, पाउजु, जस्ता धेरै गहना मन्दिरमा चढाइएको भेटिएको हो ।
२०७७ सालअघि मन्दिरमा चढेका गहना जिल्ला स्थित मालपोत कार्यालयमा बुझाउने नियम छ । उक्त नियम अनुसार मालपोतमा दाखिला गरेको समेत खड्काले जानकारी दिए । ‘केही सामाग्री पूजाको बेला चाहिने भएर मन्दिरमा थिए, केही प्रभु बैंकको लकरमा राखिएको थियो’ खड्काले भने, ‘सरोकारवालाको समन्वय र छलफलपछि ती गहनालाई के गर्ने भन्ने निर्णयमा पुगिन्छ ।’ कालिकाको पूजा गर्न आउने भक्तजनले फूल प्रसादबाहेक गहना समेत चढाउने गर्छन् ।
मन्दिरमा चढाइने भेटी भने हरेक दिन र मासिक सार्वजनिक गर्ने चलन छ । हरेक दिनको भेटी बेलुकी सार्वजनिक बोर्डमा लेखेर मात्रै गुठीका पदाधिकारी र कर्मचारी घर फर्कन्छन् । त्यस्तै मासिक रुपमा पनि खर्च सार्वजनिक गर्ने चलन छ । गुठीका अनुसार साउन महिनामा मात्रै १३ लाख २९ हजार रुपैयाँ आर्थिक संकलन भएको जनाइएको छ । उक्त कमाइबाट ९ लाख ४४ हजार खर्चेर ३ लाख ८५ हजार बचत भएको देखाइएको छ । साउनमा मन्दिरमा कमाइ कम हुन्छ । खिर खुवाउने कार्यक्रम लगायतको खर्च भने साउनमा बढी हुन्छ । अन्य महिनामा खर्चको तुलनामा आम्दानी बढी हुने गर्छ ।
