काठमाडौं, ९ कात्तिक– निर्वाचन आयोगले आसन्न प्रतिनिधिसभा र प्रदेशसभा निर्वाचनमा सहभागी हुनका लागि विभिन्न राजनीतिक दलले पेश गरेको बन्दसूचीबाट ५ सय ५० जनाको नाम हटाएको छ ।
विभिन्न राजनीतिक दलले प्रतिनिधिसभा र प्रदेशसभाको समानुपातिक निर्वाचन प्रणालीमा सहभागी हुनका लागि पेश गरेका ६ हजार ४ सय ५७ जनामध्येबाट विभिन्न कारणले अयोग्य ठहरिएका ५ सय ५० जनाको नाम हटाउने निर्णय गरेको हो ।
जसमा जरिवाना नबुझाउने ३ सय ६९ जना, दोहोरो उम्मेदवारी परेका ६६ जना, उमेर नपुगेका ५२ जना, सम्बन्धित प्रदेशको मतदाता नभएका १२ जना, फरक लैङ्गिक पहिचान भएका ३७ जना, कागजात नभएका ६ जना, मतदाता नामावलीमा नाम नभएका ६ जना, लाभको पदमा रहेका १ र कालोसूचीमा रहेका १ गरी ५ सय ५० जना बन्दसुचीबाट हटेका हुन् ।
