फाइल तस्बिर
बागलुङ, १९ मंसिर– जिल्लाको गलकोट नगरपालिका वडा नं. ५ हरिचौरबाट बडिगाड, निसीखोला गाउँपालिका हुँदै प्यूठान जोड्ने निर्वाचन क्षेत्र रणनीतिक सडक आयोजनाको काम सुरु भएको छ ।
शनिबार गलकोट नगरपालिकाको मल्ममा सडक स्तरोन्नतिको वडाध्यक्ष राजबहादुर थापाले शुभारम्भ गरे । सो अवसरमा उनले गलकोट मात्रै नभएर सिंगै पश्चिम बागलुङको विकासमा उक्त सडक मेरुदण्डका रूपमा रहने बताए ।
सडक विभागले ३० करोड ४३ लाखको ठेक्कामार्फत आयोजनाको काम अघि बढाएको हो । निर्माण कम्पनी लोपूर्ण कन्स्ट्रक्शन प्रालिका प्रबन्धक अमिन लामाले उक्त बजेटबाट आठ किलोमीटर सडक कालोपत्रे गरिने जानकारी दिए ।
सुरुको चरणमा मल्म र हरिचौरबाट गरी दुई खण्डमा कालोपत्रेका लागि पूर्वाधार तयारीको काम गरिने उनको भनाई छ । ‘कुनै अवरोध नभएमा ३० महिनाभित्रैमा काम सक्ने लक्ष्य छ’ प्रबन्धक लामाले भने, ‘एघार किलोमीटरमा सडक कटिङ हुन्छ, आठ किलोमीटर जति कालोपत्रे हुन्छ ।’
