बागलुङ, २७ मंसिर– माघेसक्रान्तिको अवसरमा जिल्लाको कुश्मीसेरामा पौष २९ देखि माघ ५ गतेसम्म जैमिनी मेला हुने भएको छ ।
मेला व्यवस्थापनका लागि सहारा क्लबका अध्यक्ष सुरेश सुनारको संयोजकत्वमा ५१ सदस्यीय मेला व्यवस्थापन मूल आयोजक समिति गठन गरिएको छ । दुर्लेवेशी खेल मैदानमा हुने मेलामा करिब डेढ लाख दर्शक भित्रिने आयोजकको अनुमान छ ।
‘स्थानीय कला संस्कृति तथा खेलकुदको सम्र्बद्वन, कृषि उद्योग व्यापार तथा पर्यटनको प्रर्वद्वन’ भन्ने नाराका साथ आयोजना हुने मेलामा जैमिनी नगरपालिका मुख्य सहयोगी रहने आयोजकले जनाएको छ ।
९ वटा उप–समिति बनाएर मेलाको तयारी थालिएको मेलामा पालिका स्तरीय पुरुष भलिवल, खुल्ला महिला भलिवल, साविक धौलागिरी अञ्चल स्तरीय खुल्ला पुरुष डबल ब्याडमिन्टन, जैमिनी डान्स आइडल, मावि स्तरीय हाजिरीजवाफ, खुल्ला रत्यौली, जैमिनी नगर स्तरीय खुल्ला पुरूष ‘बि’ लेभल डबल ब्याडमिन्टन प्रतियोगिता लगायतका कार्यक्रमहरु सञ्चालन हुने छन् ।
आयोजकले मेलामा आयोजित प्रतियोगितात्मक कार्यक्रम र पुरस्कारमा मात्रै ५ लाख ३७ हजार ३ सय ३१ रुपैयाँ खर्च हुने जनाएको छ । मेलामा करिव ३५ लाख रुपैयाँ आय–व्यय हुने अनुमान गरिएको आयोजकले जनाएको छ ।
