काठमाडौं, २ पुस– चालु आर्थिक वर्षको चार महिनामा विप्रेषण आप्रवाह २० दशमलव चार प्रतिशतले वृद्धि भई तीन खर्ब ७८ अर्ब चार करोड पुगेको छ । अघिल्लो वर्षको सोही अवधिमा विप्रेषण आप्रवाह सात प्रतिशतले घटेको थियो ।
नेपाल राष्ट्र बैंकले सार्वजनिक गरेको चालु आर्थिक वर्षको चार महिनाको विवरणानुसार अमेरिकी डलरमा विप्रेषण आप्रवाह १० दशमलव ८ प्रतिशतले वृद्धि भई २ अर्ब ९३ करोड पुगेको छ । अघिल्लो वर्ष आप्रवाह ७ दशमलव ३ प्रतिशतले घटेको थियो ।
समीक्षा अवधिमा वैदेशिक रोजगारीका लागि अन्तिम श्रम स्वीकृति लिने नेपालीको संख्या एक सय दुई दशमलव पाँच प्रतिशतले वृद्धि भई एक लाख ९५ हजार एक सय पुगेको छ । त्यसैगरी वैदेशिक रोजगारीका लागि पुनः श्रम स्वीकृति लिने नेपालीको संख्या समीक्षा अवधिमा ४६ दशमलव ४ प्रतिशतले वृद्धि भएको छ ।
यस्तै, नेपालमा चालु आर्थिक वर्षको पहिलो महिनाबाटै मुद्रास्फीति चापमा छ । चौथो महिनासम्म आइपुग्दा पनि मुद्रास्फीतिमा चाप जारी छ । सरकार र राष्ट्र बैंकले चालु आर्थिक वर्षमा मुद्रास्फीति ७ प्रतिशतभित्र राख्ने लक्ष्य लिएका थिए ।
पहिलो चौमासिकसम्म आइपुग्दा मुद्रास्फीति ८ दशमलम शुन्य ८ प्रतिशत देखिएको छ । वार्षिक बिन्दुगत उपभोक्ता मुद्रास्फीति असोजसम्म ८ दशमलब ५० प्रतिशत थियो ।
