बागलुङ, १२ पुस– बागलुङ नगरपालिकाले चारवटा सडक कालोपत्रे गर्न ५८ करोड अनुदान पाउने भएको छ । विश्व बैंकले उपलब्ध गराएको ऋणमध्ये नेपाल सरकारले बागलुङको भौतिक पूर्वाधार विकासका लागि ५८ करोड अनुदानस्वरुप दिने भएको हो ।
‘नेपाल सरकारलाई विश्व बैंकमार्फत आएको ऋण भौतिक पूर्वाधार निर्माणका लागि अनुदानस्वरुप आएको छ, अनुदान सम्झौता गतवर्ष नै भइसकेको हो’ नगरउपप्रमुख राजु खड्काले भने, ‘नगर कार्यपालिकाले अनुदान रकमबाट नगरका चार सडक कालोपत्रे गर्ने निर्णय यसअघि नै गरिसकेको छ ।’
प्राप्त हुने रकममध्ये तीन करोडको लागतमा सबै सडकको डिपिआर बनाइने र ५५ करोड बजेटबाट बागलुङ नगरपालिकाको रामरेखास्थित गणेशथानदेखि निरयघाट, ओढारचौरदेखि ढोडेनी, मूलपानीबाट भीमपोखरा र बलेवा विमानस्थलदेखि पैँयूपाटाहुँदै अमलाचौरको भैरवस्थानसम्म पुग्ने सडक कालोपत्रे गरिने छ ।
उपप्रमुख खड्काका अनुसार आएको अनुदान रकम सडक, भवन, खानेपानी, सिँचाइ तथा पर्यटन पूर्वाधारमा मात्रै खर्च गर्न मिल्ने भएपनि पक्की सडकको अभाव भएकाले सडक निर्माणमै बजेट खर्चिने नगरपालिकाले निर्णय गरेको छ ।
पाँच वर्षभित्र सक्नेगरी पूर्वाधार विकासमा ७० र सुशासनमा ३० प्रतिशतमा खर्च गर्नुपर्ने शर्त रहेको नगरपालिका इञ्जिनियर त्रिलोचन गिरीले जानकारी दिए । सुशासनतर्फ खर्च हुने बजेट भने महिला, दलित, उपेक्षित वर्गको हित, योजना तर्जुमा र प्रविधिको पुहँच स्थापनाका लागि खर्च गर्नुपर्ने सम्झौतामा उल्लेख छ ।
