काठेखोलाको रेशमा औद्योगिक ग्राम निर्माण हुँदै

बागलुङ, १३ माघ– काठेखोला गाउँपालिका वडा नं. ७ रेशको सुराजामा औद्योगिक ग्राम निर्माण शुरु गरिएको छ । कृषि उपजको बजारीकरण, व्यापार व्यवसाय प्रवद्र्धनका लागि औद्योगिक ग्राम निर्माण सुरु गरिएको हो ।
गाउँपालिकाले आर्थिक वर्ष २०७८÷७९ देखि औद्योगिक ग्रामको निर्माण सुरु गरेको वडाअध्यक्ष प्रेम लामिछानेले जानकारी दिए । उनका अनुसार, केन्द्र सरकारले पहिलो वर्ष विनियोजना गरेको ९२ लाख बजेटबाट संरचना निर्माण थालिएको छ ।
यसवर्ष केन्द्र सरकारले एक करोड विनियोजन गरेको भन्दै आगामी वर्ष औद्योगिक ग्राम निर्माण सम्पन्न हुने लामिछानेको भनाइै छ । ‘एकवर्ष काम हुन नसके पनि यो वर्ष कामलाई तीव्रता दिने छौ’ वडाध्यक्ष लामिछानेले भने ।
औद्योगिक ग्रामले स्थानीयलाई बजारीकरणमा ठूलो टेवा पु¥याउने अपेक्षा गरिएको छ । गाउँपालिकाका प्रवक्ता टीकासंगम विकले स्थानीयलाई व्यापार व्यवसाय र उत्पादनसँग जोड्न औद्योगिकग्राम निर्माण भइरहेको बताए । औद्योगिक ग्राममा अहिलेसम्म दुई टहरा र टहरासम्म पुग्ने सडक निर्माण भइसकेको छ ।
औद्योगिकग्राम निर्माण पश्चात साना, मझौला र ठूला सबै उद्योग सञ्चालन हुनेछन् । उद्योग गर्न चाहने स्थानीयले गाउँपालिकाले स्थान उपलब्ध गराउने छ । औद्योगिक ग्रामले रोजगारी सिर्जना गर्नुका साथै सामान्य वर्गको दैनिकीमा परिवर्तन ल्याउने विश्वास छ ।
किसानले उत्पादन गरेका तरकारी, फलफूल तथा दूधलाई बजारीकरणका लागि अक्षते बजारमा हाटबजार सञ्चालन गर्ने गाउँपालिकाको तयारी छ । किसानलाई बजारको सहज पहुँचमा पु¥याउन र उचित मूल्य दिलाउन हाटबजार सञ्चालन गर्न लागिएको हो । –रासस