पोखरा, २२ माघ– गण्डकी प्रदेशसभाको शुक्रबारको बैठकमा ‘विनियोजन ऐन, २०७९ लाई संशोधन गर्न बनेको विधेयक’ प्रस्तुत भएको छ । प्रदेश सरकारका आर्थिक मामिलामन्त्री सीताकुमारी सुन्दासले सो विधेयकलाई सभासमक्ष प्रस्तुत गरेकी थिइन् ।
प्रदेश सरकारले चालु आवको विनियोजित बजेट रकमान्तर गरी खर्च गर्न विधेयक संशाधनको प्रक्रिया अगाडि बढाएको हो । बजेट तथा कार्यक्रमको प्रभावकारी कार्यान्वयन मार्फत पुँजीगत खर्च वृद्धि गर्ने सरकारको लक्ष्य छ ।
विनियोजन ऐन संशोधन विधेयकमाथि आउँदो मंगलबार बस्ने प्रदेशसभा बैठकमा छलफल हुने जनाइएको छ । शुक्रबारको बैठकको शून्य र विशेष समयमा प्रदेशसभा सदस्यले विकास निर्माण र जनजीविकाका सवालमा सरकारको ध्यानाकर्षण गराएका छन् ।
प्रदेशसभा सदस्यहरु प्रदेशको स्वायत्त अधिकारलाई स्थापित गर्नुपर्ने, नवलपुरका किसानले मल, बीउ र सिँचाइ सुविधा नपाएको, म्याग्दी जिल्ला अस्पताल समयमै निर्माण हुन नसकेकोबारे सरकारको ध्यानाकर्षण गराउँदै स्याङ्जाका किसानले चिस्यान केन्द्रमा राखेको २ सय ९३ टन सुन्तला कुहिएकाले उचित क्षतिपूर्ति दिइनुपर्ने माग राखेका थिए ।
