म्याग्दी, २४ माघ– एम्बुलेन्स नपाउँदा म्याग्दीका बिरामीलाई अस्पताल पु¥याउन समस्या हुन थालेको छ । सदरमुकाममा रहेको बेनी अस्पतालमा भएको एम्बुलेन्स पुरानो भएर बिग्रन थालेपछि ‘रिफर’ भएका बिरामीलाई समस्या भएको हो ।
अस्पतालका प्रमुख डा. शंकरराज लामिछानेले भएको एउटामात्र एम्बुलेन्स बिग्रिन थालेपछि समस्या भएको बताए । ‘हाडजोर्नी सम्बन्धी समस्या भएका र अक्सिजन लगाएर रिफर गर्नुपर्ने बिरामी दैनिक दुई–तीन जना हुन्छन्, पाँच वर्ष पुरानो एम्बुलेन्स बिग्रिएर दुःख दिन थालेको छ’ डा. लामिछानेले भने ।
पछिल्लो दुई महिनामा एम्बुलेन्स मर्मतमा मात्र एक लाख ५० हजारभन्दा बढी खर्च भएको लामिछानेले बताए । बेनी अस्पतालले बागलुङ, पोखरा, काठमाडौँ, चितवन लगायतका अस्पतालमा रिफर गर्ने बिरामीलाई सवारीसाधन पाउन कठिन हुन थालेको छ ।
बेनी अस्पताल व्यवस्थापन समितिका अध्यक्ष ज्ञानेन्द्र सुवेदीले नयाँ एम्बुलेन्स उपलब्ध गराउन प्रदेश र संघीय सरकारको स्वास्थ्य तथा जनसंख्या मन्त्रालयमा अनुरोध गरिएको बताए । लायन्स क्लब, भारतीय दूतावासलगायत दातासँग पनि एम्बुलेन्स उपलब्ध गराउन प्रस्ताव गरिएको सुवेदीले भनाई थियो ।
म्याग्दी प्रवासी नेपाली संघ (मोना) बेलायतले नेपाल रेडक्रस सोसाइटीको जिल्ला र भुरुङ–तातोपानी उपशाखालाई आठ वर्षअघि उपलब्ध गराएको दुईवटा र दरवाङ उपशाखालाई मोनाले दिएको एम्बुलेन्स बिग्रिएपछि थन्क्याएर राखिएको छ ।
