बागलुङ, २६ माघ– काठेखोला गाउँपालिका वडा नम्बर ५ र ६ बिहुँका बासिन्दाले पदमार्ग निर्माणका लागि आर्थिक सहयोग गरेका छन् । विदेशमा रहेका बिहुँकोटबासीको सहयोगमा प्रसिद्ध त्रिपुरेश्वर महादेव मन्दिर जोड्ने पर्यटकीय पदमार्ग निर्माण थालिएको हो ।
पदमार्ग निर्माणमा हालसम्म ६० लाख खर्च भएको छ । प्रवासीको सहयोगमा एक किलोमिटर पदमार्ग निर्माण गरिएको निर्माण समितिका अध्यक्ष खगराज कँडेलले जानकारी दिए । बिहुँको शान्तिचोकदेखि हटियाहुँदै मन्दिरसम्म निर्माण भईरहेको पदमार्गमा स्थानीयबासीले जनश्रमदान समेत गर्दै आएका छन् ।
राष्ट्रिय गौरवको आयोजना मध्यपहाडी लोकमार्गको छेउमै रहेको मन्दिरमा आन्तरिक तथा भारतीय पर्यटकसमेत आउने गरेका छन् । पदमार्गबाट पर्यटकलाई मन्दिर पुग्न सहज हुने स्थानीय शिव कँडेलले बताए । पदमार्गमा स्थानीय स्लेट बिच्छाइएको छ ।
