बागलुङ, २८ माघ– महाशिवरात्रीका दिन दश देशका कलाकार बागलुङ आउने भएका छन् । अन्तर्राष्ट्रिय कृष्ण भावनामृत संघ बागलुङले विदेशी कलाकारलाई बागलुङमा ल्याउने भएको हो ।
महाशिवरात्रीमा धार्मिक सांस्कृतिक कार्यक्रम प्रस्तुुतका लागि १० देशबाट २५ जनाभन्दा बढी विदेशी कलाकार बागलुङ आउन थालेको अन्तर्राष्ट्रिय कृष्ण भावनामृत संघ बागलुङका प्रमुख अच्युत दास (प्रदीप भण्डारी)ले जानकारी दिए । कलाकारसँगै रसियन आर्मी अफिसर प्रो. डा. इगोर ओभलोङकोभ पनि बागलुङ आउने छन् ।
महाशिवरात्री नेपाली हिन्दूहरुको ठूलो पर्वका रुपमा रहेको भन्दै यसको महत्व, मौलिकतालाई जोगाउन र विदेशमा पनि बढी प्रचार प्रसार गर्न विदेशी कलाकारलाई बागलुङ ल्याउन लागेको दासले बताए ।
कला, संस्कृति तथा धार्मिक परम्परालाई संरक्षण गरी प्रवद्र्धन गर्न संघले धार्मिक कार्यक्रम गर्दै आएको छ । शिवरात्रीका दिन स्थानीय कलाकारले पनि धार्मिक सांस्कृतिक नृत्य तथा अन्य अभिनय प्रदर्शन गर्ने संघले जनाएको छ ।
