बागलुङ, ९ फागुन– चिल्ड्रेन लाईफ इङलिस बोर्डिङ स्कुल बागलुङको २३ औं बार्षिकोत्सवअन्तर्गत आइतबारदेखि सप्ताहव्यापी कार्यक्रमहरु सुरु भएका छन् । विद्यालयले आइतबारदेखि शुक्रबारसम्म बिबिध खेलकुद तथा रचनात्मक कार्यक्रमहरुको आयोजना गरी बार्षिकोत्सव मनाउन लागेको हो ।
विद्यार्थीको क्षमता विकास, अभिभावकको विद्यालयप्रतिको चासोमा विकास र शिक्षक कर्मचारीको क्रियाशिलता विकास हुने खालका कार्यक्रमहरु आयोजना गरिएको बिद्यालयका प्रिन्सिपल नवराज श्रेष्ठले बताए । बागलुङ नगरपालिका–१ रामरेखामा रहेको विद्यालयले सबै कार्यक्रमहरु विद्यालय परिसरमा नै गर्ने जनाएको छ ।
बार्षिकोत्सवअन्तर्गत आईतबार माध्यामिक तह ११ र १२ का विद्यार्थीका बीचमा लङजम्प र निबन्ध लेखन प्रतियोगिता सम्पन्न भएका छन् । आधारभूत तह र कक्षा ९ मा उच्चारण प्रतियोगिता, प्रावि तहमा छात्र फुटवल प्रतियोगिता र प्रावि तह कक्षा १–३ मा हस्तलेखन तथा चित्रकला प्रतियोगिता सम्पन्न भएको श्रेष्ठले बताए । पूर्व प्राथमिक तहका विद्यार्थीहरु बीचमा समेत बिबिध खेलकुद प्रतियोगिता आयोजना गरिएको थियो ।
