जनशक्तिको अभाव पूर्ति गर्न लोकसेवाको तयारी कक्षा

म्याग्दी, १८ फागुन– जिल्लाको धवलागिरि गाउँपालिकाले शैक्षिक बेरोजगारलाई लक्षित गरेर लोकसेवा र शिक्षक सेवा आयोगको तयारी कक्षा सञ्चालन गरेको छ ।
मुनामा सुरु भएको १४ दिने तयारी कक्षामा २३ जनाको सहभागिता छ । गाउँपालिकाभित्र बसोबास गर्ने माध्यामिक शिक्षा परीक्षा उत्तीर्ण भएका, शिक्षक र लोकसेवा आयोगको परीक्षामा सहभागी योग्य व्यक्तिबाट आवेदन संकलन गरेर तालिममा दिइएको हो ।
सरकारी सेवाप्रति आकर्षण बढाउन र सार्वजनिक सेवा प्रवाहका लागि आवश्यक जनशक्ति उत्पादन गर्न तालिमले सहयोग गर्ने गाउँपालिकाका अध्यक्ष प्रेमप्रसाद पुनले बताए ।
‘१०÷१२ कक्षा उत्तीर्ण हुनेबित्तिकै पासपोर्ट लिएर विदेशिने चलनले प्रशासनिक र राजनीतिक क्षेत्रमा हामी पछि परेका हौं’, पुनले भने, ‘निजामती, सेना, प्रहरी र शिक्षक पेसामा संलग्नता बढाउन निशुल्क तालिम आयोजना गरेका हौं ।’
सरकारी सेवामा स्थानीय जनशक्ति नहुँदा पालिका र विषयगत शाखामा कर्मचारी तथा शिक्षकको अभाव भएको अध्यक्ष पुनले बताए । तयारी कक्षाका लागि सहरबजारमा जान नसक्ने तर क्षमता भएकाहरूका लागि तालिम उपयोगी बन्ने अपेक्षा गरिएको छ ।
प्रमुख प्रशासकिय अधिकृत ध्रुव रिजालले निरन्तरको मेहनत र हार नमान्ने हो भने लोकसेवा र शिक्षक सेवामा सफल भइने अनुभव सुनाए । तालिममा शिक्षक सेवा र लोकसेवा आयोगको परीक्षालाई केन्द्रित गरेर सैद्धान्तिक विषयमा सहजीकरण गरिने जनाइएको छ ।