म्याग्दीमा वार्षिक २५ लाख मेट्रिक टनभन्दा बढी माटो बाढीले बगाउने गरेको छ । म्याग्दी कार्यक्षेत्र भएको भू–तथा जलाधार व्यवस्थापन कार्यालय पर्वतले सार्वजनिक गरेको अध्ययन प्रतिवेदनमा २५ लाखभन्दी बढी माटो भू–क्षयको रुपमा बगेर जाने गरेको उल्लेख छ ।
खेतीयोग्य र मलिलो माटो बाढीले बगाउँदा कृषि उत्पादनमा असर परेको छ । कार्यालयका सहायक भूसंरक्षण अधिकृत शम्भुकुमार मिश्रले हिमाल आसपास र मुस्ताङमा बढी पानी पर्न थालेपछि म्याग्दीको तटीय क्षेत्रमा बाढीको सतहसँगै कटानको जोखिम बढेको बताए ।
‘६१ प्रतिशत ६० डिग्रीभन्दा बढी भिरालो भूगोल रहेको म्याग्दीमा कमजोर भूवनोटले भू–क्षय, बाढीपहिरो तथा नदी कटानले बर्सेनि क्षति हुने क्रम बढेको छ’ मिश्रले भने, ‘भूमिगत जलप्रवाह, अव्यवस्थित भलपानी, जथाभावी सडक निर्माण र बहावमा स्थान परिवर्तन हुँदा जोखिम बढेको हो ।’
अन्नपूर्ण गाउँपालिकाबाट ८ लाख ५५ हजार १ सय ७३ टन, रघुगंगा गाउँपालिकाबाट तीन लाख ५० हजार चार सय ६८ दशमलव १० टन र बेनी नगरपालिकाबाट ३१ हजार एक सय ३७ टन माटो बाढीले बगाउने गरेको प्रतिवेदनमा उल्लेख छ ।
अध्ययन प्रतिवेदनका अनुसार मंगला गाउँपालिबाट ३३ हजार चार सय ६६ टन, मालिकाबाट एक लाख तीन हजार दुई सय ३० टन, धौलागिरि गाउँपालिकाबाट ५ लाख ९६ हजार ४ सय दशमलव १० टन र ढोरपाटन शिकार आरक्षको २ लाख ४५ हजार ८ सय ८६ टन माटो विभिन्न खोलानाला हँुदै बगिरहेको छ ।
