बागलुङ, २० फागुन– चालु आर्थिक बर्षको पछिल्लो ८ महिनामा अल्पकालिन महिला सेवा केन्द्र बागलुङमा हिंसा प्रभावित महिलाका ५० निवेदन दर्ता भएका छन् ।
आफै सम्पर्कमा आएका २९ र जिल्ला प्रहरी कार्यालयमार्फत आएका २१ गरी ५० निवेदन दर्ता भएको महिला तथा बालबालिका सेवा केन्द्र प्रमुख सरस्वतीदेबी रेग्मीले जानकारी दिइन् । ५० घटनामध्ये २० यौनजन्य दुव्र्यवहारका छन् ।
यस्तै, घरेलुहिंसा १०, सम्बन्ध बिच्छेद ११, आर्थिक हिंसा ५, बहुविवाह १, हाडनाता करणी १, अंशमुद्दा १ र बेवारिसे अवस्थामा १ रहेको छन् । ५० घटनामध्ये अधिकांश बागलुङ नगरपालिकाका रहेका छन् ।
बागलुङ नगरपालिकाका १३, जैमुनीका ५, गल्कोटका ३, ढोरपाटनका ४, काठेखोला गाउँपालिकाका ७, ताराखोलाका २, बडिगाडका ५, निसीखोलाका ४, तमानखोलाको १ र अन्य जिल्लाका ६ वटा रहेको रेग्मीको भनाई छ ।
संख्यात्मक रुपमा बागलुङ नगरपालिकाका धेरै उजुरी देखिएपनि अन्य पालिकामा समस्या धेरै रहेको तर जिल्लासम्म नआएको नगर उप–प्रमुख राजु खड्काले बताए । हिंसा पीडित महिलाको पहिचान गरी न्याय दिलाउन सबै सरोकारवाला निकायबीच समन्वय र सहयकार्यमा खड्काको जोड थियो ।
