बागलुङ, २१ फागुन– जिल्ला प्रहरी कार्यालय बागलुङले सभ्य, सुरक्षित र मर्यादित भएर फागु पूर्णिमा पर्व मनाउन आव्हान गरेको छ । होली पर्वका नाममा गलत संस्कार बढ्दै गएको भन्दै प्रहरीले सभ्य भएर होली मनाउन आव्हान गरेको हो ।
जिल्ला प्रहरी कार्यालयले सार्वजनिक अपिल जारी गर्दै सभ्य एवं सुरक्षित तरिकाले होली पर्व मनाउन आम सर्वसाधारणमा अनुरोध गरेको छ । होली पर्वलाई सभ्य, शिष्ट, स्वास्थ्यकर र मर्यादित बनाउन, होली पर्वको नाममा उश्रृखल क्रियाकलाप नगर्न, अपरिचित मानिसहरुको समुहमा होली नखेल्न प्रहरीले अनुरोध गरेको छ ।
आत्मिय रुपमा नजिक भएका व्यक्ति र आफन्तसंग मात्र होली खेल्न, कसैको इच्छाविपरित रंग, लोला, कालो मोसो, केमिकल र फोहोरपानी प्रयोग नगर्न, छाला तथा आँखामा असर गर्ने केमिकल रंगको प्रयोग नगर्न, मादक तथा लागुपदार्थ सेवन गरी सवारी साधन नचलाउन समेत प्रहरीले भनेको छ ।
प्रहरीले नियमविपरित काम गरेमा कानुन बमोजिम सजाय तथा जरिवाना हुने समेत चेतावनी दिएको छ ।
