म्याग्दी, २३ फागुन– पर्वतको जलजला गाउँपालिका वडा नं. ८ लस्तीदेखि वडा नं. ९ को बनौ जोड्ने सडक निर्माण भएपछि दुई घण्टाको यात्रा ४५ मिनेटमै पूरा गर्न सकिने भएको छ ।
सडक निर्माणसँगै बनौका बासिन्दालाई गाउँपालिकाको केन्द्र लामाखेत आवतजावतको दूरी घटेको हो । जलजला–९ बनौका वडाध्यक्ष गौबहादुर पुनले सडकमार्ग खुलेसँगै बनौ र लस्ती सीधा सडक सञ्जालमा जोडिएको बताए ।
‘बनौदेखि पाङ–अर्मादी–मालढुंगा–लामाखेत जोड्ने ४० किलोमिटर घुमाउरो सडक पार गर्न दुई घण्टा लाग्थ्यो’ पुनले भने, ‘२० किलोमिटर दूरीको बनौ–लस्ती–लामाखेत सडक अहिले ४५ मिनेटमा पार गर्न सकिने भएको छ ।’
घुमाउरो सडकको यात्रा गर्नुपर्दा बनौवासीलाई लामाखेत आउजाउ गर्न झञ्झट भएपछि २०७५ देखि लस्ती–बनौ सडक निर्माण सुरु भएको थियो । सडक निर्माणपछि बनौका ५ सय घरधुरीका साथै धाइरिङको सल्ले, एकपाटे, खानीगाउँका बासिन्दा लाभान्वित भएका छन् ।
चार वर्षको प्रयासमा सल्लेनीको सर्पको गुँड भन्ने भिरमा मार्ग खोल्ने काम यसपटक सकिएको उपभोक्ता समितिका अध्यक्ष दुलबहादुर पुर्जाले बताए । सडक निर्माणमा संघीय सरकारबाट दुई चरणमा १ करोड ३० लाख विनियोजन भएपनि भौगोलिक कठिनाइ र जोखिमका कारण निर्माण व्यवसायीले काम गर्न नसकेपछि बजेट खर्च हुन सकेन ।
गतवर्ष जलजला गाउँपालिकाले २५ लाख विनियोजन गरेर ठेक्का आह्वान गरेको थियो । अक्करे र जोखिमयुक्त पहाडमा सडक निर्माणका लागि व्यवसायी तयार नभएपछि ठेक्का रद्द भएको थियो । यसपाली गण्डकी प्रदेश सरकारअन्तर्गतको पूर्वाधार विकास कार्यालयमार्फत ३० लाख बजेट विनियोजन भएको थियो ।
