बागलुङ, ७ चैत्र– १५ बर्षअघि सञ्चालन गरिएको महायज्ञमा बोलकबोल गरेको चन्दा रकम भुक्तानी नभएपछि शान्तिदिप बहुमुखी क्याम्पसले सूचनामार्फत भुक्तानीका लागि ताकेता गरेको छ ।
बागलुङको जैमिनी नगरपालिका वडा नं. १ कुश्मीशेरामा रहेको क्याम्पस सञ्चालनका लागि २०६४ सालमा भएको धन–धान्याञ्चल महायज्ञमा बोलकबोल गरेर बाँकी रहेको रकम भुक्तानी गर्न सार्वजनिक सूचनामार्फत दाताहरुलाई ताकेता गरेको हो ।
महायज्ञमा बोलकबोल गरेकामध्ये ५० जना दाताले रकम भुक्तानी गरेका छैनन् । एक करोड २३ लाख रुपैयाँ चन्दा बोलकबोल भएकोमा ९ लाख रुपैयाँ पन्ध्र बर्षमा पनि भुक्तानी नभएको क्याम्पस व्यवस्थापन समितिका अध्यक्ष चित्रप्रसाद चापागाईंले बताए ।
‘तीन हजारदेखि दुई लाख रुपैयाँसम्म बोलकबोल गरेका दाताले भुक्तानी गर्न बाँकी छ’ चापागाईंले भने ‘दाताहरुले समयमा भुक्तानी दिए दैनिक प्रशासन र क्याम्पसको शैक्षिक बिकासमा सहज हुने थियो ।’ समयमा बोलकबोल रकम भुक्तानी नहुँदा शैक्षिक गतिबिधिमा समेत प्रभाव परेको चापागाईले बताए ।
महायज्ञबाट उठेको चन्दा रकमबाट क्याम्पस सञ्चालनका लागि भवन बनाईएको छभने १५ लाख रुपैयाँको अक्षयकोष स्थापना गरिएको छ । बोलेको रकम भुक्तानी नगर्नेहरुमा कुश्मीशेराका १८, दमेकका १२ र जैमिनी नगरपालिका बाहिरका २० जना छन् ।
