बागलुङ, ९ चैत्र– को काठेखोला गाउँपालिका–५ बिहुँको बिहुँपोखरामा प्रशासनिक भवन अधुरै छ । दोस्रो तलाको ढलानपछि बाँकी कामले दुई वर्षदेखि पूर्णता पाउन नसकेको हो ।
दोस्रो तलामा कार्यालय प्रयोजनाका लागि कोठा तयार गर्नेगरी ३ वर्षअघि वडा कार्यालयको बजेटबाट भवन निर्माण सुरु गरिएको थियो । बजेट अभावका कारण काम रोकिएपछि भवन जीर्ण बनेको निवर्तमान वडाध्यक्ष शिवप्रसाद कँडेलले बताऐ ।
वडाको बजेट, गाउँपालिकाको तोकादेशमा प्राप्त बजेट र गण्डकी प्रदेशको स्थानीय पूर्वाधार क्षेत्र विकास कार्यक्रमको सहयोग गरी ८० लाख भवन निर्माणमा खर्च भएको छ । ५५ लाख वडा कार्यालय र स्थानीय पूर्वाधार क्षेत्र विकास कार्यक्रमको २५ लाख अनुदानमा भवन तयार भएको वडासचिव शिवबहादुर थापाले जानकारी दिए ।
भुइँ र पहिलो तलाको काम सकिएको भएपनि दोस्रो तला माथिको कामका लागि समयमा बजेट नपाउँदा भवन छानोविहीन बनेको छ । ‘चालु आर्थिक वर्षको हिउँदे अधिवेशनबाट १० लाख गाउँपालिकाले विनियोजन गरेको छ’ थापाले भने, ‘ढलान गर्न बजेट पर्याप्त नभएपनि ट्रस हालेर भवन व्यवस्थित बनाउने योजना छ ।’
भवन निर्माणपूर्व वडा कार्यालय भाडाको घरबाट सञ्चालित थियो । गत वैशाखदेखि अधुरै भवनबाट वडा कार्यालयका सेवा प्रवाह हुँदै आएका छन् । प्रशासनिक भवनका सबै संरचना तयार हुँदा कर्मचारीलाई आवासीय सुविधा दिन सकिने वडा कार्यालयले जनाएको छ ।
