बागलुङ, ९ चैत्र– जिल्लाको बरेङ गाउँपालिका वडा नं. १ ओखरेनी र छापगाउँमा पहिलोपटक केन्द्रीय प्रशारण लाइनको विद्युत पुगेपछि स्थानीयमा खुसीयाली छाएको छ ।
विद्युत् प्राधिकरण बागलुङ शाखाले केन्द्रीय प्रशारण लाइनको विद्युत विस्तार गरेपछि गाउँमा उद्योगधन्दा सञ्चालन गरेर जीविकोपार्जन गर्न सहज हुने अवस्था आएको पालुङखोला लघु जलविद्युत् आयोजनाका अध्यक्ष सकसबहादुर क्षेत्रीले बताए ।
प्राधिकरणले बरेङ गाउँपालिकाको छापा र ओखरेनी गाउँका एक सय ५० घरसँगै जैमिनी नगरपालिका वडा नं. ४, ८, ९ र १० का एक सय ५० गरी तीन सय घरमा केही हप्ताअघि मात्रै केन्द्रीय प्रशारण लाइन विस्तार गरेको छ ।
विद्युत् प्राधिकरण बागलुङ वितरण केन्द्रका प्रमुख दिलीप मरासिनीले बागलुङभर केन्द्रीय प्रशारण लाइन विस्तारलाई तीव्रता दिएको बताए । स्थानीयको समस्या र आवश्यकतालाई हेरेर प्राधिकरणले विद्युत् विस्तार गरिरहेको उनको भनाई छ ।
जिल्लाका विभिन्न स्थानमा विद्युत् विस्तारका लागि यसवर्ष प्राधिकरणबाट एक करोड र नेपाल सरकारबाट ९३ लाख विनियोजन भएको थियो । केही महिनाअघि पश्चिम बागलुङका सबै पालिकामा विद्युतीकरणका लागि १४ करोड ५६ लाख बजेट स्वीकृत भएर ठेक्का प्रक्रियामा गएको मरासेनीले जानकारी दिए ।
