प्रतिकात्मक तस्बिर
बागलुङ, १२ चैत्र– जिल्लाको गलकोट नगरपालिकाले बाँझो जमिन सदुपयोग गर्दै स्थानीय किसानलाई प्रोत्साहन गर्न नवप्रवद्र्धन कोषमार्फत चालु आर्थिक वर्षदेखि ओखर खेती थालेको छ ।
गण्डकी प्रदेशमा नवप्रवद्र्वन कोषमार्फत गलकोटसहित तीन पालिकामा यो कार्यक्रम लागू भएको छ । जनताको आर्थिक विकासमा टेवा पु¥याउने र बाँझो जमिनलाई सदुपयोग गर्ने नीतिका साथ संघ र गलकोट नगरपालिकाको साझेदारीमा ओखर खेती थालिएको हो ।
चालु आर्थिक वर्षमा २ करोड २० लाखको लागतमा ६ सय २५ रोपनी जग्गामा १० हजार ओखरका बिरुवा लगाउने योजनाअनुसार काम भइरहेकोे नगरप्रमुख भरत शर्मा गेरैले जानकारी दिए । ओखर खेतीमा चालु आर्थिक वर्षमा २ करोड र आगामी चार आर्थिक वर्षमा २ करोड गरी ४ करोड रुपैयाँ खर्च हुनेछ ।
यसवर्ष २ करोड २० लाख लागतमा खाडल तयार, बिरुवा खरिद र सिँचाइ सुविधाका लागि पूर्वाधार निर्माण हुनेछ भने चार आर्थिक वर्षमा पुनः २ लाख खर्च गरी ओखर उत्पादनको चरणमा पुगेपछि स्थानीयलाई हस्तान्तरण गरिने छ ।
चालु आर्थिक वर्षमा १ करोड ४० लाख संघीय सरकार, गलकोट नगरपालिकाको ६० लाख र किसानको २० लाख सहकार्य हुने कृषि शाखा प्रमुख हरिदत्त सुवेदीले बताए । दुदिलाभाटीको पात्लेखर्क, डाँडाखेतदेखि निलुवा, पाण्डवखानीको रमुवामा छ सय २५ रोपनी जमिनमा १० हजार ओखरका बिरुवा लगाइनेछ ।
‘६ सय २५ रोपनी जमिनमध्ये ५ सय रोपनी जग्गा बाँझो रहेको अध्ययनले देखाएको छ, बाँझो जग्गा सदुपयोग र किसानको आर्थिक विकासका लागि ओखर खेती हुने सम्भावना देखिएपछि धमाधम काम भइरहेको छ’ कृषि शाखा प्रमुख सुवेदीले भने ।
सुवेदीका अनुसार, दुदीलाभाटीमा चार हजार चार सय, चमुवामा चार हजार ६ सय र पाण्डवखानी तीन हजार ओखरका बिरुवा लगाइने छ । ओखर खेतीका लागि आवश्यक सिँचाइ गर्न प्लाष्टिक पोखरी निर्माण र पाइप जडानको काम भइरहेको दुदिलाभाटी व्यावसायिक ओखर समूहका अध्यक्ष मीनबहादुर मगरले जानकारी दिए ।
