बागलुङ, १६ चैत्र– धौलागिरि बहुमुखी क्याम्पस बागलुङमा स्वतन्त्र विद्यार्थी युनियन (स्ववियू)को निर्वाचन चैत्र १८ गते हुने भएको छ । क्याम्पस प्रशासन र विद्यार्थी संगठन बीचको बिबाद अदालतमा छलफल पछि टुंगो लागेपछि निर्वाचन हुन लागेको हो ।
क्याम्पस प्रशासनले चैत्र ५ गते निर्वाचन हुन नसकेपछि चैत १८ गतेका लागि निर्वाचनको मिति तोकेको थियो । निर्वाचन मितिको बिषयलाई लिएर अखिल नेपाल स्वतन्त्र विद्यार्थी युनियन (क्रान्तिकारी) लगायतका विद्यार्थी संगठले निर्वाचन रोक्न उच्च अदालत पोखरा बागलुङ इजलाशमा रिट निवेदन दिएका थिए ।
बिद्यार्थी संगठनको असहमतीबीच स्ववियु निर्वाचनको मिति तोकिएको बिषयमा परेको रिट निवेदनमा उच्चले चैत १४ गते दुवै पक्षलाई राखेर छलफल गरेको थियो ।
उच्च अदालतका न्यायाधिश निलम पौडेलको एकल इजलाशले रिट निवेदन उपर छलफलमा आउन आदेश दिएको थियोे । छलफलपछि निर्वाचन रोक्नुपर्ने कुनै कारण नरहेको भन्दै अदालतले निर्वाचन प्रक्रिया अघि बढाउन आदेश दिएको छ ।
अदालतको आदेशपछि निर्वाचन प्रक्रिया अघि बढेको क्याम्पस प्रशासनले जनाएको छ । निर्वाचन समितिका संयोजक भक्तिराम न्यौपानेले राजीनामा दिएपछि निर्वाचन अन्यौल भएको थियो । स्ववियु निर्वाचनका लागि कार्यालय खुलेपछि अखिल क्रान्तिकारीले मतदाताको नयाँ परिचयपत्र वितरण गर्नुपर्ने मागसहित तालाबन्दी गरेको थियो ।
२ हजार ४ सय विद्यार्थी भएपनि क्याम्पसमा १ हजार ७ सय विद्यार्थी मतदाता कामय भएका छन् । १० विद्यार्थी समूहले संगठन दर्ता गरेर निर्वाचनमा होमिएका छन् ।
