जैमिनीमा ९५ प्रतिशत काम सकिए

बागलुङ, २० बैशाख– जैमिनी नगरपालिकाले चालु आर्थिक बर्षको झण्डै ९५ प्रतिशत काम सकेको छ । चालु आर्थिक बर्षमा विनियोजित बजेट तथा कार्यक्रममध्ये ९५ प्रतिशत काम सकिएपछि जनप्रतिनिधि आगामी आर्थिक बर्षको नीति कार्यक्रम र बजेटको तयारीमा जुटेका छन् ।
‘बाँकी केही ठुला आयोजनाको काम चलिरहेको छ भने बहुबर्षे कार्यक्रमको भुक्तानी दिन बाँकी छ’ प्रमुख प्रशासकीय अधिकृत चेतनाथ गिरीले भने । नगर र वडास्तरका सबै योजनाको काम चैत मसान्तभित्रै सकिएको गिरीले बताए । नगरपालिकाले चालु आर्थिक बर्षमा विनियोजन भएका कार्यक्रम सम्झौताका लागि मंसिर मसान्तको समय तोकेको थियो ।
संघ र प्रदेश सरकारसँगको साझेदारीमा सञ्चालन भैरहेका तीन सडक र एक खानेपानी आयोजनाको काम चलिरहेको योजना अधिकृत प्रेम सापकोटा बताउँछन् । त्यसबाहेक पाँच वटा झोलुङ्गे पुल बनाउने योजना सञ्चालनमा रहेका छन् ।
जैमिनीका दशवटै वडास्तरका योजनाको काम सकिएको र सम्झौता हुन नसकेका केही योजनाको रकमान्तर गरेर काम भैरहेको सापकोटाको भनाई छ ।