बागलुङ, २९ बैशाख– जिल्लाको बडिगाड गाँउपालिकाका पशुचौपायामा ‘लम्पी स्किन’ रोग फैलिन सुरु गरेको छ । गाउँपालिकाको तल्लो भागमा पर्ने वडामा ‘लम्पी स्किन’ रोगको लक्षण देखिएको गाँउपालिकाको पशु सेवा शाखाका प्राविधिक वसन्त गौतमले बताए ।
बडिगाड–२ सकन्यारको एक पशुमा ‘लम्पी स्किन’सँग मिल्दोजुल्दो लक्षण देखिएपछि नमुना संकलन गरी केन्द्रिय प्रयोगशालामा गरिएको परिक्षणबाट ‘लम्पी स्किन’ पुष्टि भएको थियो । त्यसयता पालिकाका–२ सहित ४, ५, ६ को माथिल्लो भेग र ९ नं. वडामा ‘लम्पी स्किन’का लक्षण सहितका पशु भेटिएका गौतमले बताए । बडिगाडमा ‘लम्पी स्किन’ तिब्र रुपमा नफैलिए पनि रोगका लक्षण सहितका पशु भने छिटफुट रुपमा भेटिएका उनले बताए । ‘लम्पी स्किन’ रोग सर्ने भएकाले धेरै ठाउँमा फैलिएको हुन सक्ने र किसानलाई जानकारी नहुँदा वास्तविक विवरण पालिकासम्म प्राप्त नभएको पनि हुन सक्ने उनको भनाई छ ।
नेपालमा दुई वर्षअघि देखिएको ‘लम्पी स्किन’ भाइरसका कारण लामखुट्टे, झिँगा र किर्नाको टोकाइबाट सजिलै रोगी पशुबाट निरोगी पशुमा सर्न सक्छ । रोग लागेपछि गाईवस्तुको घाँटी, पुच्छरलगायत शरीरका विभिन्न भागमा साना–ठूला गिर्खाहरू देखापर्ने, मुखबाट फिँज धेरै निकाल्ने, उच्च ज्वरो, कचेरा र सिँगान बग्ने जस्ता लक्षण देखापर्ने गर्दछ ।
पशु प्राविधिक गौतमले रोगको नियन्त्रणका लागि प्रभावित क्षेत्रका गाई–भैँसी खरिद–बिक्री तथा ओसारपसार नगर्न, रोगी पशुलाई अलग राखी उपचारमा लाग्न, पशुलाई बाहिर चराउन नलैजान आग्रह गरेका छन् । उनले बडिगाडमा ‘लम्पी स्किन’ रोगसँग मिल्ने लक्षण आफ्ना पशुहरुमा देखिए तुरुन्त पालिकामा सम्पर्क गर्न पनि आग्रह गरेका छन् ।
