प्रतिकात्मक तस्बिर
बागलुङ, २० जेठ– परियार समुदायले बजाउँदै आएको परम्परागत पञ्चेबजा लोप हुन थालेपछि बागलुङको बडिगाड गाउँपालिकाका मगर समुदायले संरक्षणको प्रयास थालेको छ ।
केही वर्षअघि बडिगाड गाउँपालिकाको दगातुम्डाँडामा पञ्चेबाजा लोकप्रिय थियो । परियार समुदायका पुराना व्यक्ति घटदै जाने र नयाँ पुस्ताले सीप नसिक्दा बाजा लोप हुने अवस्थामा पुगेकाले मगर समुदाय बाजा संरक्षणमा जुटेको हो ।
पञ्चेबाजाका नाइके लोकबहादुर दर्जीको दुई वर्षअघि मृत्यु भएपछि उक्त समूह निष्कृय भएको छ । दलित र जनजाति समुदायको बसोबास रहेको दगातुम्डाँडामा फेरि अहिले पञ्चेबाजा पहिले जस्तै घन्किन थालेको छ ।
यमबहादुर भुजेल मगरको नेतृत्वमा रहेको पञ्चेबाजा समूहले पञ्चेबाजा बजाउने गरेको छ । नैमती मगर बाजा समूह गठन गरेर उनीहरुले २०७९ असोज १ गतेदेखि बाजा बजाउन सुरु गरेका हुन् ।
समूहबाट संकलित सहयोग रकमबाट २ लाखको लागतमा बाजाको सेट खरिद गरेर बाजा बजाउन सुरु गरिएको नेतृत्वकर्ता मगरले बताए । मगरका अनुसार बाजा बजाएबापत आउने रकम सबै कोषमा राख्ने र केही बाँड्ने गरेका छन् ।
बाजा समूहमा आवद्व सदस्यहरु विदेशमा दुःख गरेर स्वदेशमै केही गर्ने उद्देश्यले फर्किएकाहरु छन् । बाजा बजाएर घर खर्च चलाउन सहज हुने भएपछि पेशालाई निरन्ता दिने समूहका अर्का सदस्य तोरन मगरले बताए ।
