प्रतिकात्मक तस्बिर
बागलुङ, २७ जेठ– बिद्यामन्दिर माबिमा शुक्रवार बालबालिकाको लागि स्वास्थ्य परीक्षण तथा आँखा उपचार शिविर सम्पन्न भएको छ ।
आँखा उपचारतर्फ कक्षा ६ देखि १० सम्मका २ सय ८७ जना बालबालिकाको परीक्षण गरिएकोमा १७ जनामा समस्या भई चस्मा बितरण गरिएको प्रधानाध्यापक छविरमण रेग्मीले बताए । बागलुङको सफल आँखा उपचार क्लिनिकको प्राविधिक सहयोगमा शिविर गरिएको थियो ।
त्यस्तै कक्षा १ देखि ५ सम्मका बालबालिकाको सामान्य स्वास्थ्य परीक्षण गरिएको थियो । बालबालिकाको परीक्षणमा २७ जना बालबालिकाको घाँटीको टन्सिल र १८ जनाको दाँतमा समस्या देखिएको थियो ।
शुक्रबार शिविरको उद्घाटन गर्दै बिद्यालय व्यवस्थापन समितिका अध्यक्ष बाबुलाल शाक्यले नियमति उपचार शिविर गर्दा बालबालिकको स्वास्थ्य अवस्थामा सुधार भई शैक्षिक क्षेत्रमा पनि प्रगती हुने बताए ।
शाक्यको अध्यक्षतामा सम्पन्न कार्यक्रमको संयोजन प्रअ रेग्मीले गरेका थिए भने आँखा उपचारका लागि नेत्र सहायक गणेश महतो र स्वास्थ्य परीक्षणका लागि बिद्यालय नर्स सविता ज्ञवाली सहभागि थिए ।
