म्याग्दी, २८ जेठ– महिलालाई आत्मनिर्भर बनाउन म्याग्दीको बेनी नगरपालिकाले ‘आमा समूहसँग उपमेयर’ कार्यक्रम सञ्चालन गरेको छ ।
आमासमूहलाई परिचालन गरेर महिलाको आर्थिक र सामाजिक सशक्तीकरण गर्ने उद्देश्यले कार्यक्रम सञ्चालन गरिएको नगरपालिकाले जनाएको छ ।
महिलालाई आर्थिकरुपमा सक्षम, आत्मनिर्भर, स्वावलम्बी बनाउँदै सामाजिकरुपमा सशक्तीकरण गर्ने उद्देश्यले कार्यक्रम सञ्चालन गरिएको बेनी नगरपालिकाका उपप्रमुख ज्योति लामिछानेले बताइन् ।
‘समुदायस्तरमा महिला सशक्तीकरण र सामाजिक कामको अगुवाइ गरिरहेका आमा समूहसँग समन्वय गरेर महिलालाई स्थानीय स्रोत, साधन र सम्भावना भएको उद्यम गरी आयआर्जनका काममा संलग्न गराउन खोजेका छौँ’ लामिछानेले भनिन् ।
महिला आर्थिक रुपमा सक्षम भएमा हिंसा न्यूनीकरण हुनुका साथै रोजगारी सिर्जना भई आत्मनिर्भर हुने भएकाले समाजमा अगाडि ल्याउने उद्देश्यले कार्यक्रम सञ्चालन गरिएको उपप्रमुख लामिछानेको भनाई थियो । उहाँका अनुसार दुई वटा वडाका तीन÷तीन वटा आमा समूहले आयआर्जन र सीपमूलक काम सुरु गरेका छन् ।
नगर उपप्रमुख लामिछानेको प्रस्तावमा कार्यपालिकाको पहिलो बैठकले उक्त कार्यक्रम सञ्चालन गर्ने निर्णय गरेको थियो । चालु आर्थिक वर्षमा २० लाख विनियोजन भएकामा कार्यक्रमका लागि नगरपालिकाले वडा नं. ३ र ९ लाई छनोट गरेको छ ।
बेनी नगरपालिकाको स्वर्गाश्रम, बेलढुंगा र मण्डली आमा समूहले स्थानीय जातका कुखुरापालन सुरु गरेका छन् । तीन समूहमा आबद्ध ३५ जनालाई खोर निर्माणका लागि अनुदानका साथै कुखुरापालन सम्बन्धी तालिम र चल्ला वितरण गर्ने योजना छ ।
वडा नं. ९ को गलेश्वर आमा समूहमा आबद्ध २० जना महिलाका लागि चप्पल र नेप्टेचौरमा ढालमोड, नेमकिन र तोरीपानीमा आलुको चिप्स बनाउने तालिम सुरु भएको वडाअध्यक्ष चक्र केसीले बताए ।
