बागलुङ, २९ जेठ– मध्यरातमा दुई वटा गोरु काटेको आरोपमा प्रहरीले नौ जनालाई पक्राउ गरेको छ । बागलुङको बडिगाड गाउँपालिका–७ माझखर्कस्थित छविलाल पुनको गोठमा दुई गोरु काटिरहेको अवस्थामा प्रहरीले उनीहरुलाई पक्राउ गरेको हो ।
प्रहरीले नौ जनासहित गोरु काट्न प्रयोग गरिएको हातहतियार र ७० केजी मासु बरामद गरेको प्रहरी कार्यालय बागलुङका प्रहरी नायव उपरिक्षक मदन केसीले जानकारी दिए । पक्राउ पर्नेमा माझखर्कका उक्तम बुढा मगर, देबबहादुर बुढा मगर, शेरबहादुर बुढा मगर, तेजबहादुर बुढा मगर, गिरबहादुर बुढा मगर, हिमाल बुढा मगर, गिरप्रसाद बुढा मगर, मनबहादुर बुढामगर र मानसिंह बुढा मगर छन् ।
पक्राउ पर्ने नौ जनालाई इलाका प्रहरी कार्यालय बुर्तिवाङबाट थप अनुसन्धानका जिल्ला प्रहरी कार्यालय ल्याइएको केसीले बताए । प्रहरीले घटनास्थलबाट ७० केजी गोरुको मासु, बन्चरो एक थान, चक्कु दुई थान, हसिया तीन थान र दुई वटा गोरुको टाउको बरामद गरेको छ । पक्राउ परेका नौ जनालाई पशुपन्छी सम्बन्धी कसुरअन्तर्गत मुद्दा चलाइने प्रहरीको भनाई छ ।
यसैबीच, १५ वर्षीया बालिकालाई बलात्कार गरेको अभियोगमा बागलुङको ताराखोला गाउँपालिका–५ का २१ वर्षीय प्रकाश भन्ने लोकबहादुर घर्तीलाई १० वर्ष कैद सजाय भएको छ ।
जिल्ला न्यायाधिश दिवाकर भट्टको आदेशले घर्तीलाई कैदसँगै ५ लाख जरिवाना र २० हजार रुपैयाँ क्षतीपूर्ती फैसला गरेको जिल्ला अदालत बागलुङका इजालाश अधिकृत गंगाधर सापकोटाले जानकारी दिए । ०७९ साउन ५ गते विद्यालयबाट फर्किर्दै गरेकी बालिकलाई निज घर्तीले ताराखोलाको जंगलमा बलात्कार गरेको भन्दै पीडित पक्षले भदौ ८ गते जिल्ला प्रहरी कार्यालय बागलुङमा उजुरी दिएका थिए ।
