म्याग्दी, १४ असार– बेनी नगरपालिकाले आगामी आर्थिक बर्षदेखि कित्ता काट खुलाउने गरी नगरभित्रको जग्गा वर्गीकरण सम्पन्न गरेको छ ।
आगामी आर्थिक बर्षदेखि कार्यान्वयनमा ल्याउने गरी जग्गा वर्गीकरणलाई कार्यापालिकाबाट निर्णय गरेर १३ औँ नगरसभाबाट अनुमोदन गरिएको नगरपालिकाका नगरप्रमुख सुरत केसीले बताए ।
नगरप्रमुख केसीका अनुसार, अनुमोदन गरेको जग्गा वर्गीकरण सहितको निर्णयलाई विभागमा लगेर स्विकृत प्रश्चात अनुमति लिएर आगामी आर्थिक बर्षदेखि नगरभित्र कित्ता काट सुरु गरिने भएको छ ।
जग्गाको कित्ता काट रोकिएका कारण नगरबासीलाई समस्या भएको उनको भनाई थियो । आगामी आर्थिबर्षदेखि कित्ता काट सुरुभसंगै वित्तिय संस्था र ब्यक्तिलाई जग्गा किनबेचमा सहज हुने केसीले बताए ।
आगामी बर्षदेखि कित्ता काट सुरु गर्ने गरी भू–उपयोग नीति अनुसार बेनीमा आवाशीय, कृषि, औधोगिक, ब्यवसायिक, खानी तथा खनिज क्षेत्र, वन, नदि, खोला, ताल सिमसार, सार्वजनिक उपभोग, साँस्कृतिक तथा पुरातात्विक महत्व र अन्य क्षेत्रमा गरिएको जग्गा वर्गीकरणलाई नगरसभाबाट पारित गरेको छ ।
नेपाल सरकारले नै जग्गाको वर्गीकरण गरेर मात्र कित्ता काट गर्नका लागि परिपत्र गरेपछि जग्गाको कित्ताकाटका लागि नगरपालिकाले यस बर्ष जग्गाको वर्गीकरण गरेको थियो । केसीले जग्गाको कित्ताकाट सुरु भएमा राजश्व समेत बढ्ने अपेक्षा गरिएको बताए ।
