ऐतिहासिक बिषय उजागर गर्न ‘बाजेबज्यैको कथा, मेरो चित्र’ कार्यक्रम

बागलुङ, ४ साउन– हजुरबुबा हजुरआमासँग नाती नातीनीसँगै नबस्दा परम्परा, संस्कृति र ऐतिहासिक बिषयहरु ओझेलमा परेको सामाजिक अगुवाले बताएका छन् ।
बिद्यामन्दिर पुस्तकालयले रिड नेपालको सहकार्यमा बुधबारदेखि शुरु गरेको बाजेबज्यैको कथा, मेरो चित्र कार्यक्रमका सहभागिले पछिल्लो समय पुस्ताबीचको सम्पर्क टुट्दा नेपाली परिवेस नै ओझेलमा परेको बताएका हुन् ।
बरिष्ठ बाल कथाकार धु्रबप्रसाद घिमिरेले बालबालिकाले पाको पुस्ताबाट केही सिक्न पाएनन् भने राष्ट्रको अस्तित्व संकटमा पर्ने बताए । उनले राष्ट्र बाँच्नका लागि कला, संस्कृति, इतिहासको कथा र गाथा पुस्तान्तरण हुनुपर्ने बताए ।
‘बसाइसराइसँगै हाम्रा ऐतिहासिक क्षेत्रका कथापनि मेटिन थालेका छन्’ उनले भने, ‘हाम्रो जाती, भाषा र धर्मले सिकाएका धेरै बिषयले हामीलाई धनी बनाएको हो ।’ जनैपूर्णिमा, चैतेदशै र बुद्ध जयन्तीका कथा बिर्सेर भ्यालेन्टाइ डेका कथा बुझ्ने पुस्ताले नेपालको साँस्कृतिक आन्दोलन असफल बन्ने अबस्थामा पुगेको उनले बताए ।
पश्चिमा संस्कृतिले मिच्दै नेपाली कला र संस्कृति बिर्सने अबस्था ल्याउने अबस्था आएकोले रिड नेपालले ग्रामीण क्षेत्रका कथा संकलन गर्न लागिएको बताए ।
कार्यक्रममा रिड नेपालकी बरिष्ठ फिल्ड संयोजक बिना गोलेले शैक्षिक संस्थाको माध्यमबाट जोडिएर ग्रामीण क्षेत्रमा शिक्षा, कृषि, जीविकोपार्जन तथा महिला सशक्तीकरण जस्ता क्षेत्रमा काम गर्न लागेको बताइन् ।
यसअघि दर्जन जिल्लामा पुगेर रिड नेपालले ती क्षेत्रको इतिहास, महत्व र त्यहाँको गाथालाई कथा बनाएर लिपिबद्ध बनाउने र बालबालिकालाई सुनाउने काम गरिसकेको उनले जानकारी दिइन् ।
कार्यक्रममा बागलुङ नगरपालिकाका प्रमुख बसन्तकुमार श्रेष्ठले आफ्नै हजुरबुबा देख्न नपाउँदा कथा सुन्ने अबसर गुमाएको भन्दै छिमेकी हजुरबुबाबाट सिकेको काम र कथाले जीवनको राजनीतिक र सामाजिक यात्रा अगाडि बढाउन सकेको बताए ।
बिद्यामन्दिर पुस्तकालयका अध्यक्ष राम थापा अविरलको अध्यक्षता, सचिव राजनप्रसाद शर्माको संचालन र उपाध्यक्ष रामचन्द्र शर्माको स्वागतमा सम्पन्न कार्यक्रमको पहिलो दिन बालबालिकाको दुइवटा समूह बनाएर कार्यशाला गरिएको थियो ।
एउटा समूहले पाका पुस्ताको कथा सुनेर लेख्ने अभ्यास गरेका थिए भने अर्को समूहले चित्रकारिता सिकेका थिए । चित्रकारितालाई कसरी शुरु गर्ने, के सन्देश दिने र कसरी चित्रकारितामा अभ्यस्त बन्ने भन्ने सिकाइएको थियो भने कथा समूहलाई बुढापाकाले सुनाएका कथा लिपिबद्ध गर्ने र त्यसलाई अन्तिम रुप दिने बारे सिकाइएको थियो ।